Нестерева (Бястинова) Мария Михайловна

Нестерева (Бястинова) Мария Михайловна 1935с. балаҕан ыйын 1 күнүгэр Таатта оройуонун Уус-Амма нэһилиэгин Соҕуйугар орто бааһынай кэргэҥҥэ төрөөбүтэ.

Аҕата Бястинов Михаил Дмитриевич II, Баасан Уус II диэнинэн бар дьонугар биллибит айылҕаттан талаааннаах мас ууһа, Российскай Федерация потребительскай коооперациятын туйгун булчута. Ийэтэ Халыева Александра Андреевна колхозка сүөһү көрөөччүнэн үлэлээбитэ. Кинилэр сүрэхтэрин холбоон 5 оҕону төрөппүттэрэ. Улахан убайа Гаврил Михайлович Бястинов хорсун буойун, артиллерист, Аҕа дойду Улуу сэриитин кыттыылааҕа, “Кыһыл Сулус” орден кавалера. Иккис убайа Прокопий Михайлович Бястинов “Коммунизм” совхоз директорын солбуйааччытынан таһаарыылаахтык үлэлээбитэ. Эдьиийдэрэ Варвара, Ольга сэрии тэбиитинэн кылгас үйэлэммиттэрэ.

Сэрии саҕаланар сылыгар Мария Михайловна 6 сааһын туола илик оҕо этэ. Алын кылаастарга Ытык-Күөл оскуолатыгар эдьиийигэр олорон үөрэммитэ. Онтон Чычымах 7 кылаастаах оскуолатын 1954с. үөрэнэн бүтэрбитэ.

1952-1953сс. Соҕуйтан Уодайга көһөн кэлбиттэрэ. Сайын от үлэтигэр, оҕуруокка, бурдук быһыытыгар, “Ньургуһун” колхозка, фермаҕа ньирэй көрөөччүнэн, кыһынын сүөһү көрүүтүгэр үлэлээбитэ.

1956с. Игидэй нэһилиэгиттэн төрүттээх Гаврил Гаврильевич Нестеровтыын ыал буолан олохторун холбообуттара. Гаврил Гаврильевич аатырбыт булчут, үлэ, тыыл ветерана, чугаһынан иһиллибэтэх дьикти кылыһахтаах куоластаах норуот ырыаһыта, уус-уран самодеятельность солбуллубат кыттыылааҕа, элбэх көрүүлэр, конкурстар кыайыылаахтара этэ. Иллээх дьиэ кэргэн түөрт уолу, алта кыыһы төрөтөн күн сирин көрдөрбүттэрэ, киһи-хара оҥортоон атахтарыгар туруорбуттара. Ол туоһутунан, 1982с. Герой-Ийэ үрдүк аатын ылбыта.

Мария Михайловна эдэр эрдэҕиттэн олус элэккэй, холку майгылааҕа. Оҕолорун кыра эрдэхтэринэ сылаастык таҥыннарар баҕаттан кэтэр таҥастарын барытын бэйэтэ тигэрэ. Саха киһитин сиэринэн, ыалдьыты-хоноһону үөрэ-көтө көрсөр, кэпсэтэр, туох баарынан аһатар, күндүлүүр идэлээҕэ. Уон оҕо бары ыал буолан, алаһа дьиэ тэринэн, иэримэ дьиэни иччилээн олороллор. Кинилэр үөрэхтэнэн бэйэлэрин идэлэрин толору баһылаабыт бэртээхэй үлэһиттэр. Күн-күбэй Ийэ, Мария Михайловна сырдык аатын, олоҕун салҕыыллар араас эйгэҕэ үлэлии сылдьар оҕолоро, сиэннэрэ, хос сиэннэрэ.

Мария Михайловна үлэ, тыыл ветерана, улуус бочуоттаах гражданина.

Наҕараадалара:

1982с. “Герой – Ийэ” орден;
1970-1971-1973сс. “Ийэҕэ албан аат” I-II-III степеннээх мэтээллэр;
1941-1945сс. “Аҕа дойду Улуу сэриитигэр килбиэннээх үлэтин иһин” мэтээл;
2005с. “Үлэ ветерана” мэтээл;
2011с. “Уус-Амма нэһилиэгин социальнай-экономическай сайдыытыгар кылаатын иһин” мэтээл;
2012с. Таатта улууһун бочуоттаах гражданина.