Нерлова Агафья Егоровна (1916 – 1999)

Нерлова Агафья Егоровна үлэ, тыыл бэтэрээнэ, 1916 сыл ахсынньы ый 18 күнүгэр Амма оройуонугар II-с Чакыр нэһилиэгэр дьадаҥы дьиэ — кэргэнигэр төрөөбүтэ. Бииргэ төрөөбүт 4-тэр этэ: убайа Иван, балтылара Варвара, Мотрена. Отуттан тахса сыл производстваҕа – ферма араас ыарахан үлэтигэр, ыччат, сүөһү уонна ньирэй көрөөччүнэн, асчытынан, ыанньыксытынан үтүө суобастаахтык үлэлээбитэ.

Кэргэнэ Афанасий Петрович Ксенофонтов суруйан хаалларбытынан (15.01.1965 с.) Агафья Егоровна аан маҥнай үлэҕэ 1932 с. төрөөбүт-үөскээбит нэһилиэгэр “Социализм суола” диэн ТОЗ-ка киирэн, 1948 с. диэри сүөһү иитиитигэр үлэлээбит. Ити кэм быыһыгар 1942-1943 сс. Аммаҕа киирэн промкомбинакка остуорастаабыта. Бу мантан кэргэнэ, хос эһэбит Афанасий Петрович, икки кыра уолаттарын (Афоня – 12, Гоша – 1,5 саастаах) хаалларан, сэриигэ барбыта. 1943 с. Агафья Егоровна дойдутугар, II-с Чакырга төннөн тахсан колхозка уонна ясляҕа үлэлиир. Кэнники “Социализм суола” уонна “Яборов” диэн колхозтар холбоһоннор “Ленин” аатынан колхоз буолаллар.

Сэрии кэмигэр киһи барыта, ол иһигэр чакырдар эмиэ “Барыта — фронт, барыта — кыайыы туһугар!” диэн ыҥырыынан бэйэлэрин харыстаммакка, ыарахан үлэҕэ күргүөмнээхтик үлэлээбиттэрэ.

Кэлин 1949-1952 сс. Омоллоон нэһилиэгэр “Буденнай” аатынан колхозка доярканан, асчытынан үлэлиир. 1953 с. бочуоттаах сынньалаҥҥа тахсыар диэри Болугур нэһилиэгэр “Правда” колхозка, онтон “Амма” совхоз Болугур отделениятыгар үлэлээбитэ. Кэлин сынньалаҥҥа да олордор,син биир быстах үлэҕэ үлэлиирин тохтоппотоҕо.

Афанасий Петровичтыын биэс оҕону төрөтөн, улаатыннаран, киһи-хара оҥортоон, атахтарыгар туруоран, үөрэхтээх дьон буолалларыгар кыһаллан, өбүгэлэрин сирдэригэр өр сылларга үлэлээн, араас ыарахаттары тэҥҥэ туораан эйэ-дэмнээхтик олорбуттара.

Олоҕун салгыыр, аатын ааттатар элбэх сиэннэрдээхтэр, хос сиэннэрдээхтэр, хос-хос сиэннэрдээхтэр.

Агафья Егоровна 1999 сыллаахха ыарахан ыарыыттан күн сириттэн барбыта.

 

Автор: Нерлова Агафья Егоровна хос сиэнэ В.Уаров 10 “Г” кылааһын үөрэнээччитэ