Марков Константин Николаевич (10.05.1929-30.06.2015)

Тыыл, үлэ ветерана, ЯАССР Баһаарынай сулууспатын туйгуна, өр сылларга колхоз, совхоз үлэтигэр биригэдьиирдээбитэ.

Мин 1929 сыллаахха Игидэй нэһилиэгэр колхозтаах Николай Семенович Марков уонна Арыылаахтан төрүттээх Анна Сергеева Портнягина дьиэ кэргэттэригэр төрөөбүтүм. Бииргэ төрөөбүт алтыа этибит. Сэрии иннинэ саамай кырабыт ыалдьан өлбүтэ. «ТОЙОН УЙАТЫН» солооһунугар сир пардыы сырыттахпына Д.П.Бояров биригэдьиир кэлэн, сэрии буолбутун туһунан иһитиннэрбитэ. 1943 с. кулун тутарга аҕабыт, муус устарга ийэбит утуу-субуу олохтон туораабыттара. Биһиги биэс оҕо тулаайах хаалан баран, оскуолабытыгар остуорастаан сыл тахсыбыппыт. Ынахтаах этибит. От суох этэ, үөрэх кэнниттэн былах быһарбыт, онон өлбөккө сыл тахсыбыппыт. Сайыҥҥы сынньалаҥҥа бараргын кытта колхоз үлэтэ саҕаламмытынан барар: күрүө оҥоруута, чэрдийэ сабыыта, сир паардааһына, сиилэс үлэтэ, уһун унньуктаах от үлэтэ. Сороҕор сарсыарда күн тахсыыта туран баран, күн киириэр диэри үлэлиир этибит. Киэһээ-сарсыарда уу-хааһы сиибит, күнүс үөрэлээх суорат буолар. Чэй суох. Таҥас-сап олох суох, сайын атах сыгынньах сылдьарбыт. Кыһын уларыйбат биир таҥас буоолар. Кураан буолан ойбоннорбут уолан, сүөһүлэрбитин ыраах уулатабыт.

1944 с. икки быраатым Проня уонна Николай Уолба детдомугар баран үөрэнэн, кыстаан кэлбиттэрэ. 1943 с. бурдук үүнэн арыый өрө тыыныы буолбута. 1945 с. саас «Кэнчээри» диэн сиргэ ыһыы ыһан бүтэрэн эрдэхпитинэ, «Кыайыы буолла!» — диэн дэриэбинэттэн сурах иһиллибитэ, үөрүү-көтүү буолбута.

1946 с. саас оскуолаҕа үөрэнэ сырыттахпына «Үлэҕэ килбиэнин иһин» Сталин төбөлөөх мэтээли туттарбыттара. Кэлин хас да юбилейнай мэтээли ылбытым. 1976-1979 с.с «Таатта» сохпуоска баһаартан араҥаччылыыр сулууспаҕа үлэлээн, «Баһаартан сэрэхтээх буолуу туйгуна» бэлиэнэн, Бочуотунай Грамотанан наҕараадаламмытым.