Мария Ивановна и Кыым Софронович Белолюбские

Эбэбит Белолюбская Мария Ивановна 1933 сыллаахха атырдьах ыйын 27 күнүгэр Амма улууһун Абаҕа нэһилиэгин Ала Биэ алааһыгар күн сирин көрбутэ.

1943 сыллаахха, 10 саастааҕар Аҕа дойду сэриитигэр аҕатын атаарар, ийэтинээн уонна балтынаан үһүөн хаалаллар. Ити куһун Абаҕа оскуолатыгар маҥнайгы кылааска үөрэнэ киирэр, эһэтэ илиититтэн сиэтэн илдьэн оскуолаҕа киллэрбит. Бу сыл саас, саамай күүстээх сут дьыл буолбут, аччыктаан, тоҥон эрэйи көрбуттэр. Ол да буоллар үөрэх тохтооботох, оскуолаҕа күн аайы үөрэнэллэр эбит.

Кыра эрдэҕиттэн күүстээх үлэҕэ сылдьыбыт, ким үлэлиир – аһыыр, ким үлэлээбэт – аһаабат диэн кэпсиирэ эбэбит. Күннээҕи астара диэн биир оҕоҕо икки сүүс кыраам лэппиэскэ, биир хомуос суорат буолара эбитэ уһу.

Сэрии бүппүтүн да кэннэ, олох соччо тупсубатах, элбэх доруобуйатынан эмсэҕэлээбит дьон баара уһу, ас-үөл аанньа суоҕа диирэ. Үрэхтэн үрэххэ көһө сылдьан туох үлэ баарынан барытыгар үлэлээн-хамсаан улааппыт.

Эбэбит Мария Ивановна 49 сыл тухары И.Я. Строда аатынан Абаҕа колхуоһугар үлэлээн бастыҥ үлэһит буолар.

Онтон эһэбит Белолюбский Кыым Софронович 1931 сыллаахха атырдьах ыйын 24 күнүгэр Абаҕаҕа төрүүр. Бөтүн нэһилиэгин оскуолатыгар түөрт кылаас үөрэхтэнэр.

Аҕата сэриигэ барбытын кэннэ ийэтинээн уонна икки быраатынаан хаалаллар. Сэрии саҕаланыаҕыттан колхуоска күүстээх үлэҕэ сылдьан улаатар. Кэнники сылларга хонуу үлэтигэр үксүн үлэлээбит, тырахтарыыстаабыт.

Эһэбит Кыым Софронович колхуос тутаах суоппара этэ. Кини молоко, вода массыналарга, күһүнүн комбаайыҥҥа үлэлиирэ.

1952 сыллаахха эбэлээх эһэбит көрсөн ыал буолаллар, биир уол оҕолоноллор. Иккиэн үлэ үөһүгэр сылдьан, дьиэ-уот туттан, сүөһү ииттэн өр сылларга дьоллоохтук олорбуттара.

С. Аргунов, 5 кылаас