Максимова Ксения Ильинична

Максимова Ксения Ильинична (1929г-2010 гг.)

Биһиги ийэбит Максимова Ксения Ильична 1929с. Ыам ыйын 22 күнүгэр Наахара (Сыстаҥ) нэһилиэгэр төрөөбүтэ. Оҕо сааһа Сыстаныгар ааспыта. 1942с. аҕата сэриигэ барбыта. Манттан саҕалаан 13-14 саастаах оҕолор улахан дьону кытта тэҥҥэ колхозка үлэлииллэрэ. Биһиги ийэбит сайынын атынан от мустарара. Ол саҕана окко улахан күрэх тэрийэллэрэ. Куоталаһыыга бастаабыттарга колхуостан биир-икки килоограмм арыы, оттон оройуоҥҥа миэстэлэстэххинэ 3-5 метр өлбөх таҥас биэрэллэрэ. Биһиги ийэбит оройуоҥҥамиэстэлэһэн “Стахановец” буола сылдьыбыт. Бу туһунан “Сталин суола” (26.08.1944с. №35) оройуоннааҕы хаһыакка суруйбуттар. Сэрии сылларыгар атынан почта таһыытыгар үлэлээбитэ. “Хара сурук” кэлбит үһү диэн сурах түргэнник тарҕанара ону истэн аһыныы, куртуйуу, ытаһыы-соҥоһуу бөҕө буолара. “Хара суругу” ийэм Сэбиэт бэрэссэдээтэлин кытта илдьэн биэрэллэр эбит.

Сэрии кэнниттэн 1947с. “1941-1945”сс. Килбиэннээх үлэһит иһин” (Сталин төлбөхтөөх) мэтээлинэн наҕараадаламмыта. Ийэлээх аҕам 1949с. ыал буолбуттара. Сэриигэ сылдьыбыт, Сэбиэт бэрэссэдээтилэ үлэлиир Максимов Егор Николаевичка кэргэн тахсыбыта. 9 оҕону күн сирин көрдөрөн, үлэлээн-хамнаан, ньир бааччы олох олорбуттара.

Ийэбит дояркалаан, өр сыл дьааһылаҕа пенсияҕа тахсыар диэри үлэлээбитэ. Дьэ, ити курдук биһиги төрөппүттэрбит үлүгэр сэрии ыар кэмнэрин эттэринэн, хааннарынан билэн, сэрии кэннинээҕи айгыраабыт оло     чөлүгэр түһэрэргэ үлэ бөҕөтун үлэлээн, элбэх оҕону атахтарыгар туруоран, кырдьык даҕаны, киһи холобур оҥостор олоҕун олорон аастахтара.

Автор: И.Гаврильева