Макарова (Тарабукина) Мария Григорьевна (1935-2015 гг.)

 

Макарова (Тарабукина) Мария Григорьевна атырдьах ыйын 20 күнүгэр 1935 сыллаахха 2 Мэлдьэхси нэһилиэгин Ыһыыкап сэлиэнньэтигэр төрөөбүтэ. Оҕо сааһа Маалаҕай арыытыгар ааспыта. Бииргэ төрөөбүт сэттиэ этилэр. Мария Григорьевна бэһис оҕонон күн сирин көрбүтэ. 1942-1943 сыллаахха Томтор сэттэ кылаастаах оскуолатыгар үөрэнэ киирбитэ. Бастакы учуутала Скрыбыкин Андрей Иннокентьевич этэ. Маалаҕай арыыттан сатыы сылдьан үөрэммитэ. Үөрэҕэр мөлтөх буолан оскуоланы бутэрбэтэҕэ. Сайынын от үлэтигэр, кыһынын сүөһү көрүүтүгэр үлэлээбитэ. Эдэр сааһыгар Кутукутта диэн Наахара сиригэр икки сыл сүөһү көрбүтэ. 1959 сыллаахха Макаров Модест Николаевичтыын холбоһон ыал буолбута. Алта оҕолоохтор. 1969 сыллаахха кэргэнэ өлөн, кыра кыыс оҕотун ииттэрэ биэрэр уонна биэс оҕолоох соҕотох хаалар. Улахана 8 саастаах, кырата сэттэ ыйдаах. Үс улахана кыргыттар, кыралара уолаттар. Ыал буолуоҕуттан колхозка доярканан үлэлээбитэ уонна 1970 сылтан пенсияҕа тахсыар диэри кулуупка остуораһынан үлэлээбитэ. Биэс оҕотугар остуорас хамнаһа тиийбэт буолан кулуупка кочегарынан үлэлиир этэ. Нэһилиэк уопсай үлэтигэр аккаастаммакка барытыгар кыттар этэ. Билигин оҕолоро бары үлэһит, ыал буолан олороллор. Үс оҕото үрдүк үөрэхтээх, икки оҕото орто анал үөрэхтээхтэр. Уон аҕыс сиэттэрдээх. Уон тоҕус хос сиэннээх.

Мария Григорьевна 2015 сыллаахха күн сириттэн барбыта.

Оҕолоро:

Евдокия – 1960с, иистэнньэҥ идэлээх, Дьокуускайга олорор;

Анна – 1961с, учуутал, Томторго олорор;

Парасковья – 1963с, учуутал, Томторго олорор;

Николай – 1964с, суоппар, Томторго олорор;

Василий – 1969с, экономист-бухгалтер, Дьокуускайга олорор.

Наҕараадалара:

  1. Медаль «Материнство II степени» – 18.06.1969.
  2. Медаль «Ветеран труда» — 28.12.1990.
  3. Медаль «За доблестный труд в ВОВ 1941-1945гг» — 14.08.1996.
  4. Медаль «50 лет Победы в ВОВ 1941-1945гг» — 02.03.1996.
  5. Медаль «Маршал Советского Союза» — 20.02.1997.
  6. Медаль «120 лет И.В.Сталину» — 15.08.1999.
  7. Медаль «50 лет Победы Советского народа в ВОВ 1941-1945гг» — 18.09.1999.
  8. Юбилейный знак РС(Я) «60 лет Победы в ВОВ 1941-1945гг» — 05.03.2005.
  9. Медаль «60 лет Победы в ВОВ 1941-1945гг» — 08.05.2005.
  10. Почетный гражданин МО «Томторский наслег» — 16.06.2007

 

 

Автор: А.Иванова, правнучка