Макаров Иван Кириллович (1932 г.р.)

 

Аҕа дойду сэриитин кэмигэр Чурапчыттан хоту көһөрүллүү кыттыылааҕа, үлэ уонна тыыл бэтэрээнэ.

Биһиги хос эһээбит Макаров Иван Кириллович 1932 сыллаахха от ыйын 1 күнүгэр Чурапчы Сылаҥар Макаровтар дьиэ кэргэҥҥэ иккис оҕонон төрөөбүтэ.

Аҕа дойду сэриитин кэмигэр, 1942 сыл күһүнүгэр дьонун кытта Чурапчы оройуонуттан Хоту көһөрүүгэ Кэбээйи оройуонугар барбыттара. Дьоно балык булдугар үлэлэлээбиттэрэ. Оҕолор кинилэргэ көмөлөһөн сэрии кэмин аас-туор олоҕун эттэринэн-хааннарынан билбиттэрэ, улахан дьону кытта тэҥҥэ үлэлээбиттэрэ.

Дойдуларыгар эргиллэн кэлэн баран, Иван Кириллович  оскуола кэнниттэн Өлүөхүмэ техникумун, Чурапчы педучилищетын бутэрбитэ. Өр сылларга Муомаҕа, Өймөкөөҥҥө учууталлаабыта. СГУ биолого-географическай факультетын кэтэхтэн үөрэнэн бүтэрэн, Чурапчыга интернат-оскуолаҕа  учууталлаабыта, Соловьев аҕыс кылаастаах оскуолатын директорынан үлэлээбитэ. Оҕону иитиигэ-үөрэтиигэ элбэх сыратын биэрэн, айымньылаахтык, таһаарыылаахтык үлэлээбитэ. Ол туоһутунан, ыраах Өймөкөөнтөн тиийэ, үөрэппит-ииппит оҕолорун махталлара буолар.

Кэлин, Иван Кириллович өссө электрик идэлээх буолан, Чурапчытааҕы сетевой учаастак начальнигынан ананан, өр сылларга таһаарыылаахтык үлэлээбитэ. Энергетика ветерана. Бочуоттаах сынньалаҥҥа олорор.

Биьиги хос эһээбит сэрии кэмигэр улахан дьону кытта тэҥҥэ фроҥҥа барар балык булдугар үлэлээн Улуу Кыайыыны уһансыбыта диэн киэн туттабыт!

 

 

Авторы: А.Петров, 6 «А» кылаас, А.Петрова, ученица 4 класса.