Лукинова (Ильина) Вера Ильинична (1920-2011)

Мин аҕам өттүнэн хос эбээм Лукинова (Ильина) Вера Ильинична – тыыл, үлэ бэтэрээнэ, 5 оҕо тапталлаах ийэтэ, элбэх сиэн, хос сиэн ытыктанар эбээтэ.

1920 сыллаахха, Нам улууhун Түбэ нэhилиэгэр Ильин Илья Петрович уонна Колесова Прасковья Степановна дьиэ-кэргэнигэр бастакы оҕонон күн сирин көрбүт. Ийэтэ 3 саастааҕар өлөн, 10 сааhын ааhыар диэри Көбөкөҥҥө эбээтигэр олорбут. Онтон Түбэҕэ төннөн кэлэн, аҕата туран биэрбит дьиэтигэр оскуола аhыллан 3 кылааhы бүтэрбит. Ыhыллыы кэмигэр аҕатын кулаак оҥороннор, куолаhын быспыттар. Ол иhин төттөрү эбэтигэр Көбөкөҥҥө төннөн, колхуоска 14-15 сааhыттан колхоз үлэhитэ буолбут. Окко, ыhыыга, сүөhү көрүүтүгэр үэлии сылдьан 1940 сыллаахха, 1 уол оҕолоох огдообо хаалбыт Лукинов Константин Гаврильевичка эргэ тахсыбыт.

1942 сыллаахха кэргэнэ II хомуурга хабыллан сэриигэ ыҥырыллан барбытыгар 5 саастаах уол, 6 ыйдаах кыыс оҕолордоох хаалбыт. Сэрии ыар сылларыгар ыанньыксыттаабыта уонна ферма сэбиэдиссэйинэн үлэлээбит. От үлэтигэр, ыhыы, хомуур кэмигэр ас астааччынан сылдьыбыт. Бу олус эрэйдээх, быыччык уонна уустук үлэ. Ол кэмҥэ ас да кырыымчыга бэрт эбит. Ол иhин оҕонньоттор өрүскэ киирэн балыктаан онон эбинэллэрэ эбит. Ферматтан суорат уонна иэдьэгэй ыытар буоланнар үлэhиттэр хоргуйбатахтар. Үлэhит илии олох тиийбэт буолан ыалдьыбыт, аччыктаан иэдэйбит, күүстэрэ эстибит дьонун оннугар бэйэтэ солбуйара. Эдэр, доруобай эрэ буолан ити ыар кэмнэри тулуйбут. Кэргэнэ Константин Гаврильевич сэрииттэн Кыайыы көтөллөөх эргиллэн кэлэн дьиэ кэргэнигэр күүс-көмө буолан, иккиэн өссө таhаарыылаахтык тапталлаах холкуостара сайдарын туhугар туох баар кыахтарын, сатабылларын ууран туран үлэлээбиттэр. 1970 сыллаахха пенсияҕа тахсыар диэри илиитин үлэттэн араарбатаҕа. 5 оҕону төрөтөн, улаатыннаран, элбэх сиэни, хос сиэннэри көрсөн, бүөбэйдэспит дьоллоох эбэ, хос эбэ. 2011 сыллаахха 91 сааhыгар олохтон туораабыта. Биhиги үлэни өрө тутан иллэхтик олорбут күндү дьоммут үтүө-сырдык мөссүөннэрин өйбүтүгэр-сүрэхпитигэр илдьэ сылдьабыт, кинилэр олохторун салгыыбыт.

Н.Омукова. 5в кылаас, МОБУ «Саха гимназия»