Лукин Егор Васильевич

Мин хос эһэм – Лукин Егор Васильевич – тыыл бэтэрээнэ.

Хос эһэм – Лукин Егор Васильевич ыам ыйын 6 күнүгэр 1929 сыллаахха Горнай оройуонун Солоҕон нэһилиэгэр күн сирин көрбүтэ. Кини 1941 сыллаахха Аҕа дойду Улуу сэриитэ саҕаланыытыгар 12 саастааҕа, сэрии ыар сылларын этинэн-хаанынан билбитэ.

Хос эһэм ахтыытыттан: «Сэрии саҕаланаатын кытта үлэни-хамнаһы кыайар колхуос туруу үлэһиттэрин сэриигэ хомуйан илдьэ барбыттара. Оччотооҕу колхоз  сүөһүтэ-аһа барыта оҕонньоттор, дьахталлар уонна оҕолор көрүүлэригэр хаалбыта. Сокуон кытаанаҕа, биир да сүөһүнү энчирэппэт туһугар кытаанах ирдэбил  баара. Куһаҕан көрүүттэн-харайыыттан сүөһү өллөҕүнэ сокуон кытаанах ирдэбилигэр эппиэттиириҥ. Ол иһин сүөһү аһылыгын бэлэмнээһиҥҥэ турары-турбаты барытын үлэлэтэллэрэ, аҥар илиилээх, аҥар атахтаах дьон кытта  үлэлииллэрэ. Колхозтарга барыларыгар үлэ минимума  диэн баара. Ол аата хас биирдии киһиэхэ сыл устата  бачча көлөһүн күнүн өлөрүөхтээххин диэн сорудах биэрэллэрэ. Үлэни барытын биригэдьиирдэр туталлара, күн аайы үлэҕин суруйан, үлэ киниискэтигэр суруйтаран иһэриҥ, үлэ минимумун толорботоххуна суукка эппиэттиириҥ. Сэрии сылларын устатын тухары арыы, эт дьүһүнүн көрбөтөхпүт, барыта нолуокка барара»

Хос эһэм сэттис кылааһы 1945с. бүтэрбит. Бастакы кылааска оҕо ахсаана тиийбэккэ үөрэхтэрин тохтоппуттар эбит, ол иһин, бастакы кылаааска 9 сааһыгар үөрэнэ киирбит. Сэттиһи бүтэрэн баран колхоз араас үлэлэригэр, ол иһигэр булчут буолан Үөһээ Бүлүү Туобуйатыгар тиийэ бултаабыт, колхоз сорудаҕын толорон Покровскайдааҕы леспромхозка мас кэрдээччинэн үлэлээбит. 1948 сыллаахха Бэрдьигэстээххэ орто оскуола арыллан 8 кылааска үөрэнэ киирбит, 1951 сыллаахха 10 кылааһы үөрэнэн бүтэрбит. Доруобуйата мөлтөөн салгыы үөрэммэтэх. 1952 сыллаахха райсовет культураҕа отделыгар бастаан инспекторынан, кэнники бухгалтерынан үлэҕэ ылыллыбыт. 1961 сыллаахха Горнайдааҕы лугомелиоративнай станцияҕа главнай бухгалтерынан үлэҕэ ыыппыттар. 1964 с. бедөҥсүйбүт Горнай холхуоска экономиһынан ылбыттар. Онно үлэ бөҕөтүн үлэлээбит, холхуостаахтар көлөһүн күнүнэн ааҕыллар хамнастарын  харчынан төлөөһүҥҥэ көһөрбүт, 7 отделениеҕа хозрасчеты киллэрбит. 1968 сыллаахха МСО (колхозтар икки ардыларынааҕы тутуу тэрилтэтигэр) главнай бухгалтерынан ананан 25 сыл кэриҥэ үтүө суобастаахтык үлэлээбитин элбэх махтал суруктар, бочуотунай грамоталар, сыаналаах бириистэр туоһулууллар. 1992 с. булт хаһаайыстыбатыгар, 1996 сылтан 2006 сылга дылы Сиинэ национальнай паркатыгар старшай бухгалтерынан үлэлээбит. 2006 сыллаахха, 77 сааһыгар бочуоттаах сынньалаҥҥа тахсыбыт. Хос эһэм 2020 сыллаахха 91 сааһыгар күн сириттэн барбыта.

Мин хос эһэм – Лукин Егор Васильевич – Тыыл Бэтэрээнэ, Горнай оройуонун бочуоттаах олохтооҕо. Мин хос эһэбинэн киэн туттабын.

 

Автор: Самсонов Э., 2 кылаас үөрэнээччитэ