Лазарева Пелагея Тарасовна             (1919-2001).

 

Мин хос эбээм Лазарева Пелагея Тарасовна 1919 сыллаахха Чурапчы оройуонун Кытаанах нэһилиэгэр төрөөбүтэ. 6 кылаас үөрэхтээх. 16 сааһыттан колхуоска ыанньксыттаабыт. Хос эһээбин Лазарев Михаил Ксенофонтовичтыын 18 сааhыгар ыал буолан, 63 сыл бииргэ олорбуттара, элбэх оҕоломмуттара.     1938 сыллаахха саҥа ыал буолан баран 9 саастаах төгүрүк тулаайах хаалбыт аймахтарын уолу иитэ ылан улаатыннарбыттара, үөрэттэрбиттэрэ. Ол Дмитрий Петрович Коркин  Саха сирэ киэн туттар, ССРС, РСФСР, Саха АССР үтүөлээх тренера .

1942 сыллаахха Чурапчы улууһун 41 колхуоһа күүс өттүнэн  хоту  улуустарга фронт туһатыгар балыктыы диэн  көһөрүллүбүтэ. Мин  хос эбээлээхпин, “Кыhыл сэрииhит” колхуоһу кытта Булун оройуонугар көһөрүүгэ ыыппыттара. Хоту бастаан тиийэн  баран элбэх  ыарахаттары көрсүбүттэрэ, аччыктаабыттара. Үс хонукка биир курууска бурдугу хоруордан баран  ууга кутан сии сылдьыбыттар. Ынах-сүөһү иитэри көҥүллээбэтэхтэр. Ыалга күҥҥэ  биир эрэ лиитэрэ  күөх үүтү биэрэллэрэ.  Кыһын  муус аннынан  күҥҥэ  иккитэ үстэ илиминэн  балыктыыллара.Туппут балыктарын   дьиэлэригэр ылбаттар, барыта фроҥҥа барар.  Эмчит да эмп да суох буолан киһи, оҕо бөҕө өлөрө.

1943с. оттоох–мастаах, сүөһүлээх сиргэ Боро5он нэһилиэгэр “Сырдатыы” холкуоска көһөллөр. Хос эбээм онно ыанньыксытынан, хос эһээм холкуос председателинэн таһаарыылаахтык үлэлээбиттэрэ. 1951 с. икки уол, кыыс оҕолонон дойдуларыгар  Кытаанахха төннөллөр. Пелагея Тарасовна — тыыл үлэ бэтэрээнэ, үрдук көрдөрүүлээх үлэтин иһин Саха АССР Үрдүкү Советын Бочуотунай грамотатынан, “1941-1945сс Аҕа дойду Улуу сэриитигэр килбиэннээх үлэтин иһин” мэтээлинэн, “Ийэ Албан Аат” уордьанынан, “Комммунистическай үлэ ударнига” бэлиэнэн, бочуотунай грамоталарынан наҕараадаламмыта.

Үчүгэй көрдөрүүлээх ыанньыксыт, тыллаах -өстөөх, өйдөөх — санаалаах буолан дьон эрэнэн холкуос бырабылыанньатын  чилиэнинэн, нэһилиэк сэбиэтин депутатынан  хаста да талыллыбыта. Элбэх үүтү ыырга социалистическай куоталаһыы хас да төгуллээх кыайыылааҕа. Хос эбээм үтүө майгылаах, түргэн туттуулаах, кыайыгас үлэһит этэ. 82 сааһыгар өлбүтэ.

 

 

Автор: А.Кириллин, 7 кылаас