Кузьмина Елена Михайловна

Мин хос эбээм тылыл бэтэрээнэ Кузьмина Елена Михайловна 1930 сыллаахха атырдьах ыйын 10 күнүгэр Чакыр нэһилиэгэр төрөөбүтэ. Ийэтэ Лукина Елена диэн Уорҕаттан төрүттээх. Аҕата Кузьмин Михаил Федорович Хондуга олохтоох, Саһыл уйата диэн алаастаах этэ. Аҕата сэрии иннинэ 6 саастааҕар, эрдэ өлбүтэ. Ийэтэ 1942 сыллаахха сэрии бара турдаҕына өлбүтэ. Ийэтэ уонна быраата Өктөбүрүүн ол да иһин эрдэ хоргуйан, ыалдьан өлбүттэрэ. Эдьиийэ Кэтириис Хадаарга кэргэн тахсан барбыта. Онон соҕотох хаалбыта. Сайынын холкуоска ынах хомуйар этэ. Кыһынын интернаатка киирэн үөрэнэр этэ. Онтон Ийэтэ өлбүтүн кэннэ 5-с кылаас кэнниттэн уурайан холкуоска үлэлии тахсыбыта. 1943 сыллаахтан Тойон Арыы диэн сиргэ Орджоникидзэ оройуонугар от сии тахсыспыта, сүөһү көрөөччүнэн. Чакыртан Тойон Арыыга диэри сатыы барбыттара, ынахтарын үүрэннэр. Дьэ, онтон дойдутугар Чакырга кэлэн баран 1944 сылтан 14 сааһыттан холкуоска постояннай доярка буолбута. Онтон ыла 1980 сыллаахха диэри холкуоска, совхуоска дояркалаан пенсияҕа тахсыбыта. Кэргэнинээн Мугудайтан төрүттээх Сивцев Прокопий Николаевичтыын 1956 сылтан 40 сыл бииргэ олорбуттара. Елена Михайловна 8-с оҕону төрөтөн, 30 сиэннэнэн, 23 хос сиэннэнэн олорон ааста. “Ийэ албан аата” (Материнская слава) 1, 2, 3 степеннээх мэдээллэринэн наҕараадаламмыта. Холхуоска үлэлии сылдьан Райкомол Бүрүөтүгэр чилиэн буолан Чакыртан, Эбэ ферматыттан Чурапчыга сыарҕалаах атынан сылдьан Чурапчыга мунньахтарга сылдьара. Нэһилиэк советын депутаатынан талылла сылдьыбыта. 1978 сыллаахха “Үлэ албан” аатын III степеннээх орден, Сталин, үлэ тыыл мэдээллэринэн наҕараадаламмыта. Үлэлээбитин тухары пятилеткалар Ударниктара, үлэҕэ социалистическай куоталаһыы кыайыылааҕа буолуталаабыта. Үлэ тыыл Ветерана. Чакыр нэһилиэгин Бочуотунай олохтооҕо. “Сэрии сылларын оҕото” (дети войны) мэдээлинэн наҕараадаламмыта. Саха сирин Республикатын Ытык Сүбэтэ “Бочуотунай кырдьаҕас” (Почетный старейшина) диэн знак туттарыллыбыта. Саха Республикатын “Гражданскай килбиэнин иһин” (Гражданская доблесть) знагынан наҕараадаламмыта. Үлэлээбит сылларыгар эдэр ыччаттарга наставнигынан, фермаҕа заведующайынан үлэлээбитэ.

 

Автор: А. Литвинцева, 10 “Д” кылааьын уорэнээччитэ.