Дата рождения: 1919-07-12
Место рождения: Республика Саха (Якутия), Горный улус, с. Кептин
Место работы: Малтанинская участковая больница
Должность: Повар
Воспоминания: Заровняева-Кубарова Анисия Иннокентьевна 1919 сыллаахха от ыйын 12 күнүгэр үлэһит бааһынай кэргэнигэр Муҥур Бас учаастагар төрдүс оҕонон күн сирин көрбүтэ. Кини 1931 сыллаахха Быһыттаахха начальнай оскуолаҕа үөрэнэн 4 кылааһы бүтэрбитэ. 1934 сылтан “Пушкин” колхозка араас үлэҕэ кыттыбыта. 1940 сыллаахха IV Маалтааны төрүт олохтооҕор Кубаров Егор Михайловичка кэргэн тахсыбыта, сэрии иннигэр 1940 сыллаахха Аана диэн кыыс оҕоломмуттара. Кэргэнэ сэриигэ барбытын кэннэ оҕотун илдьэ учаастактан учаастакка көһө сылдьан ыанньыксыттаабыта. Аҕа дойду Улуу сэриитин сылларыгар колхозка сүөһу көрүүтүгэр, от-мас тиэйиитигэр, Солоҕон Силээниттэн оҕуһунан бурдук таһыытыгар, о.д.а. үлэлээбитэ. Хос-хос эбээм сэрии сылларыгар чугас дьонугар, аймахтарыгар көмөлөһөн, куйуурдаан, бэс сутукатын соҕотуопкалаан, Кэптинтэн нуормалаан бурдук, чэй аҕалан абыраабыта.
Хос-хос эбээм 1952-1957 сс. Кэптин оскуолатыгар остуораһынан, 1957-1972 сс. Участковай балыыһаҕа санитарканан, поварынан пенсияҕа тахсыар дылы үтүө суобастаахтык үлэлээбитэ.
Үчүгэй үлэтин иһин грамоталарынан, үлэ, тыыл ветеранын знагынан, “За доблестный труд в ВОВ 1941-1945 гг.”, “50 лет ВОВ”, “Маршал Советского Союза К.Г. Жуков” мэтээллэринэн на5араадаламмыта. 2003 сыллаахха ыалдьан күн сириттэн бараахтаабыта.
Анисия Иннокентьевна, Егор Михайлович дьоһуннаах олоҕу олорон ааспыттара. Кинилэр үс оҕо амарах ийэлээх аҕата этилэр.
Хос-хос эбээм туохтан да толлубакка, үлэни өрө тутан инники күлүөнэтигэр холобур буолар. Мин кининэн киэҥ туттабын.

Автор: К. Романова