Кривошапкина –Андросова Устинья Андреевна 1931 г.р.

Кривошапкина  Устинья Андреевна 1931 сыллаахха Таатта оройуонун Баайаҕа нэһилиэгэр колхозтаах бааһынай кэргэнигэр  төрөөбүт.

Ийэтэ Анастасия Никоновна балтараа, аҕата 9 саастааҕар өлбүттэр. Төрөппүт ийэтиттэн 11, маачаха ийэтиттэн 6 оҕоттон соҕотох ордон хаалбыт. Кини 9 саастааҕар аҕата билиҥҥи Томпо оройуонун Кириэс Халдьаайыга сүөһү үүрүүтүгэр барарыгар бииргэ төрөөбүт балтыгар Кэтириискэ Тиит Арыы Бэтилиэккэтигэр хаалларан барбыт. Аҕата 1942 с. Кириэс Халдьаайыга ыалдьан өлбүт. Онон кыркый Үүстэ кыыс төгүрүк тулаайах хаалан икки хараҕа суох Агунов Иннокентий Федоровичка иитимньи буолан хаалар. Хараҕа суох оҕоннорго көрөр хараҕынан, туттар илиитинэн буолар.

Сэрии сут сутурҕан дьылларыгар оччотооҕу оҕолор курдук адьас кыра сааһыттан колхоз араас ыарахан үлэлэригэр, Суоттунан таһаҕас тиэйиитигэр, дьаам сүүрдүүтүгэр сылдьыбыт. Үөрэниэн, тэҥнээх оҕолорун кытта сылдьыан баҕараахтыыра да, тойон оҕонньор кинини аттыттан араарбатаҕа. Маҥнайгы кылааска үөрэниэх буолан истэҕинэ төттөрү ыҥыттаран ылан үөрэҕэ суох хаалбыта.Кини тулаайах буолан олох туох баар ньулуунун аһыытын бүүс бүтүннүү билбитэ. 19 сааһыгар 1952 сыллаахха Кыһыл Танда киһитигэр Кривошапкин Константин Николаевичка суорумньунан кэргэн тахсан Тандаҕа Уолбукка олохсуйаллар. Онно 4 кыыстара күн сирин көрбүттэрэ. Устинья кэргэнигэр көмөлөһөн уһанарыгар күөрт эрийэн, балта тимирин тутан, окко тэбис тэҥҥэ сылдьыһара.

Кэлин 1960 сыллаахха Танда томторугар көһө киирэн олохсуйбуттара. Уол оҕоломмуттара. Элбэх хоноһо ыалдьыт сылдьар ньир бааччы ыал буолан олорбуттара.

Устинья Андреевна сайаҕас, аламаҕай майгылааҕа. Кини  нэһилиэк, агитзона общественнай олоҕор активнайдык кыттара, уус уран смодеятельноска кыттарын олус сөбүлүүрэ. Ордук табыллан хомуска оонньуура. Ветеранар хордара тэриллиэҕиттэн биир саамай көөҕүлээччитэ этэ. Түүлээхтэн тигэр дьоҕурдааҕа, кини оҥоһуктара нэһилиэк, оройуон быыстапкаларыгар туруоруллубуттара. Араас оҥоһуктара оройуон уран тарбахтаахтарын күрэҕэр миэстэлэһэрэ. 1972 сыллаах ыһыахха сахалыы таҥас күрэҕэр балтараа саастаах уолунаан кыттан бастаан тураллар. Бастаан оҕуруотаһын үүннэрии үгэннээн турдаҕына ыаллара аграном идэлээх Екатерина Иннокентьевна көҕүлээһининэн чугас ыаллар көҕүһэ, көҕүһэ оҕурсу, помидор ыһыытынан, сибэкки олордуутунан дьарыктаммыттара.  Киниэхэ үүнээйи өлгөмнүк үүнэрэ.

Устинья Андреевна оҕолорун, сиэннэрин дьону ытыктыырга, үлэни таптыырга, айылҕаҕа харыстабыллаахтык сыһыаннаһарга уһуйбута. Оҕолоро үөрэхтээх, үлэһит дьон буолалларыгар ис сүрэҕиттэн кыһаллара.

Устинья Андреевна кыра эрдэҕиттэн ыарыһах буолан 59 сааһыгар ыарахан ыарыыттан суох буолбута.

Автор: А. Молонова, 3 класс.