Корякина Матрена Николаевна

Биһиги эбээбит, хос эбээбит, Корякина Матрена Николаевна, А5а дойдуну көмүскүүр сэрии са5аланар сылларыгар 17-лээҕэ. Сэрии ыар сылларыгар күүрээннээх үлэҕэ туруммута. Саамай үлэни кыайар, сүүрэр-көтөр сааһа. «От-мас үлэтигэр эр дьонтон итэҕэһэ суох, соро5ор баһыйа тутан үлэлээбитим»,- диэн киэн туттан кэпсээччи. Үчүгэй от охсооччу быһыытынан ордук биллэрэ. Күн аайы 9 суотайтан кыраны охсубат эбит. «Анаан охсорум буоллар гааттан ордугу холку охсуом этэ»,- диэччи. Күн бүгүҥҥү диэри кэпсээннэ сылдьар. Эр дьону аһара түһэрин иһин со5ото5ун сылдьан охсор эбит. Сэрии сылларыгар ас-танас кэмчи буолан аччыктыыллара. «Улаханнык хоргуйуох дьону о5ом Ваня баар буолан быыһаабыта. Бултаан аһатан абыраабыта», — диэн бииргэ төрөөбүт быраатыгар Хабаров Иван Николаевичка улаханнык махтанан кэпсиирэ, кини сэрии са5аланарыгар баара суо5а сэттэлээх эрэ киьи эбит. Сэрии бүппүт сайыныгар нэһилиэккэ эбэм Кыайыы ыһыа5ын тэрийбитэ. Сэрии кэнниттэн Сталин мөссүөннээх мэтээлинэн эбэм ийэтэ, бииргэ төрөөбүт убайа наҕараадаламмыттар. Эбээбитин эмиэ түһэрбиттэр да, то5о эрэ биэрбэтэхтэр. «Арааһа биир дьиэттэн элбэх киьи ылбатын диэбиттэрэ буолуо», — диэччи. Киниэхэ ити мэтээли 1992 сыллаахха туттарбыттара. «Сталин мэтээлин ылар дьоллоох эбиппин», — диэн улаханнык үөрбүтэ. Эбэм өлүөр диэри нэһилиэк кырдьа5астарын салайа сылдьыбыта. Кинитэ суох кырдьа5астар биир да тэрээьиннэрэ буолбат этэ. Ол са5ана биьиги дьиэбит байыаннай штаб курдук буолааччы. Кини наар: «Дьон туһугар кыһаллар, дьон туһугар сүүрэр-көтөр киһи хаһан ба5арар дьоллоох буолар», -диэччи. «Доруобуйабыт үчүгэй, бачча сылдьар дьон туох буолуохпутуй? Кыайыыбыт параадыгар Сталиммыт кыһыл былаа5ын өрө тутан баран хаамыахпыт»,- дэһээччилэр чугас дьүөгэтинээн. Ол иһин кинилэр сырдык ба5аларын толорон, Кыайыы параадыгар портреттарын сэргэ өрө тутан, сиэннэрэ биһиги хаамыахпыт.

Автор: Д.Корнилов, 11 «А», А.Корнилов, 6 «А» кылаас уорэнээччилэрэ