Корякин Архип Михайлович 

Дириҥ ытыктабылы биллэрэн туран, Улуу Кыайыы 80 сылыгар аймах-билэ дьоммутун ахтан-санаан ааһар иэстээхпит. Аҕа дойду Улуу сэриитэ саамай ыар, хаан тохтуулаах уонна хорсун быһыылаах сэрии этэ.

Биһиги хос эһэбит Корякин Архип Михайлович 1924 сыллаахха Үөһээ Бүлүү улууһун I Боотулуу нэһилиэгэр 6 оҕолоох ыалга төрөөбүтэ. Сэрии саҕаланыыта эһэбит икки убайдара сэриигэ барбыттара. Барыта фронт туһугар, барыта өстөөҕү кыайыыга диэн санаанан дьон бэйэтин харыстаммакка үлэҕэ туруммута. «Сотору-сотору декада биллэриллэрэ. Ол кэмҥэ эһэбит, Мөрөөйү диэн сиргэ хоно сылдьан, декадаҕа киирсэн, мэлдьи нуорманы куоһаран, бириэмийэ ылара (табаар уонна дохуот үллэһигэр уоннуу киилэ кыыймыт арыы – 1 декадаҕа)» диэн «Боотулуу нэһилиэгэ» кинигэҕэ Деллонова Аана ахтар.

1944 сыллаахха бэс ыйыгар эһэбит Аккыым сэриигэ ыҥырыллыбыта. Кини ол кэмҥэ 19 саастааҕа. Ити ыҥырыллан, Иркутскайга Мальта диэн станцияҕа тиийбитэ. 1944 с. күһүнүгэр диэри сулууспалаан, бэлэмнэниини ааһан, Арҕаа сэриигэ ыытыллыбыта. Сэрии буола турар сиригэр сэрии сэбин таһыытыгар, кэлин ат көлө көрүүтүгэр-истиитигэр сылдьыбыта. Кини ол сэрии туһунан хаһан да кэпсээбэт этэ. «Память» кинигэҕэ сурулларынан эһэбит 1945 сыллаахха эргиллибит, Забайкальскай фронт 19 с.п. 53.3 п. Саллаата диэн сурулла сылдьар.

«Сэрииттэн кэлэн баран, бэдэрээккэ таһаҕас таһыытыгар кыһыннары-сайыннары мэлдьи солбуллубат киһинэн Корякин Архип Михайлович буолара, Архип атынан таһан бэрт өр сылларга Боотулууну аһаппыт-таҥыннарбыт олус үтүөлээх» диэн «Боотулуу нэһилиэгэ» кинигэҕэ Золотарева Мария Николаевна ахтар.

Эһэбит 1991 сыллаахха ыалдьан олохтон туораабыта. Кини Аҕа дойдуну көмүскүүр Улуу сэриигэ кыттыбытын иһин «Орден Отечественной войны III степени», «За Победу над Германией в ВОВ 1941-1945 гг.» мэтээллэринэн наҕараадаламмыта.

Биһиги хос эһэбит, боростуой саха саллаата, төрөөбүт дойдутун көмүскээн, кырыктаах сэриигэ хорсуннук кыттыбытынан киэн туттабын, киниэхэ сүгүрүйэбит. Эһэбит төһө да кылгас олоҕу олордор дьонугар-сэргэтигэр, оҕолоругар, сиэннэригэр үтүө өйдөбүлү хаалларбыта үйэ-саас тухары умнуллуо суоҕа.

 

Айсена, Күннэй, Уран Кычкиннар,

А.Е. Мординов аатынан Тааттатааҕы

лицей үөрэнээччилэрэ.