Коротов Роман Егорович биһиги хос эһэбит Коротов Роман Егорович Аллыҥаҕа төрөөбүт. Биэс бииргэ төрөөбүт убайдыы-бырааттардаах. Аҕалара Хоһуоччук Уйбаан уола Егор Анисимов Нэксэгэйгэ олорбут. Биһиги эһэбит Сүөдэр Роман маҥнайгы кэргэниттэн оҕото. Уопсайа үстэ кэргэннэнэ сылдьыбыт. Соҕотох бэйэтэ 14 киһини (бэйэтин уонна иитиэйэх оҕолорун) ииппит эбит. Иитийэх оҕолору үөрэттэрээри бэйэтин уолаттарын үөрэхтээбэккэ үлэҕэ анньыбыт дэһэллэр эбит дьон. Ииппит оҕолорун ахтыыларыттан көрдөххө, оҕонньор сүрдээх көнө майгылааҕа. «Кыһыл Күүс» колхуос чилиэнэ уонна туруу үлэһитэ эбит. Туох баар үлэни дьэ кини толороро. Сэрии сылларыгар дьиэ кэргэнэ аччыктаабатах.

Сэрии саҕанааҕы ыар сыллар алдьархайдарын туһунан биһиги элбэҕи билэбит. Ол курдук кыайыыны сэрии толоонугар эрэ буолбакка тыылга эмиэ уһансыбыттара. Үлэни барытын байыаннай бириэмэҕэ сөп түбэһиннэрэн өрөбүлэ суох түүннэри-күнүстэри үлэлииллэрэ. Сэрии алдьархайын кытары аны уот-кураан дьыллар үүммүттэрэ. Хоргуйуу, аччыктааһын өрө турбута. Элбэх дьон аччыктаан өлбүтэ.

Ол саҕана куобах аһара үөскээн, оҕонньор сылга 365 куобаҕы сохсолоон ылара. Ону иккис кэргэнэ кыайан аһаабакка быстаран эрэр ыалларга түҥэтэлиир эбит. Иккиэн сүөһулээх, сылгылаах  дьон холбоһон тоттук олорбуттар. Колхуоска биэс ыанар ынаҕы уонна түөрт сылгыны холбообуттар. Бэйэлэрэ ынах этин сиир буолан куобах этин хоргуйан олорор ыаллагар түҥэтэллэрин Аллыҥалар махтана саныыллара. Сэрии сылларыгар хоргуйбакка олорбут буолан, Арамаан аатын үйэтитээри иитийэх оҕолоро кини аатын ылбыттар. Үтүө өйдөбүллээх ахталлар.

Иккис кэргэниттэн уопсай биир кыыс уонна икки уол төрөөбүтэ да бары өлөөхтөөбүттэр.

Үһүс кэргэниттэн эмиэ оҕолордоох. Дора, Варвара Арсений диэн оҕолордоох. Дора Кэбээйигэ учууталлан баран билигин онно олохсуйан олорор.  Бу хаартыскаҕа оҕонньор үһүс кэргэнин, уолун Сүөдэри уонна сиэннэрин кытта.

Роман аһара үлэһит киһи этэ дииллэр. Хара өлүөҕэр диэри үлэлии-хамсыы сылдьыбыт. Аһара хамсанарыттан хаанын баттааһына олус күүстээх буолан киһи тулуйбат төбө ыарыыта буолаахтаабыт. Ол саҕана эмп-том суоҕа кэриэтэ. Тулуйар кыаҕа суоҕуттан хомолтолоохтук күн сириттэн күрэммит этэ.

Кини олорбут өтөҕө Аллыҥа нэһилиэгин илин өттүгэр турар.

 

Василий Романович Коротов ахтыытыттан

суруйда 1 «Б» үөрэнээччитэ Ю. Амонова