Колотинский Петр Гаврильевич

 

Мин эһээм үлэ, тыыл ветерана, Колотинскай Петр Гаврильевич муус устар 1 күнүгэр Таатта улууһун Дьохсоҕон нэһилиэгэр төрөөбүтэ. 1941-1942 үөрэх дьылыгар В.И Ленин аатын сүгэр Уолба сэттэ кылаастаах оскуолатын бүтэрбитэ. Аҕата Гаврил Терентьевич Колодезников 1942 сыллаахха сэриигэ барбыта уонна ити сыл сэтинньи 26 күнүгэр кыргыһыы хонуутугар геройдуу оҕунна диэн биллэрии туппуттара. Онно братскай могилаҕа көмүлүннэ диэн эбит. Эһээм 13 саастааҕыттан  биригэдьииргэ суруксутунан үлэлээбит. Ким тугу, төһөнү үлэлээбитин сурукка киллэрэн испит. 1945 сыллаах сайын илиинэн от охсуутугар республикаҕа чемпионанаан Республика бастыҥ от охсооччута аатын ылбыта. Ити курдук эһээм Петр Гаврильевич оҕо эрдэҕиттэн ыарахан үлэҕэ эриллэн, улахан дьону кытта тэҥҥэ сылдьыбыт, аччыктыыры, хоргуйууну барытын билбитэ.

1948 сыллаахха Ытык-Күөл орто оскуолатын бүтэрэн баран, төрөөбүт нэһилиэгин ааҕар балаҕан сэбсиэдиссэйинэн, комсомол Тааттааҕы райкомун учуокка уонна стаистикаҕа сиэктэрин сэбиэдиссэйинэн үлэлээбит.

1953 сыллаахха Чурапчытааҕы педучилищены бүтэрэрн баран учууталынан Абый, Таатта улуустарыгар үлэлээбит. Активнай позициялаах, салайар дьоҕурдаах эдэр киһини Абыйдааҕы комсомол райкомун пионердары уонна оскуолаҕа үөрэнэр ыччаты кытта үлэҕэ отдел сэбиэдиссэйинэн, иккис, бастакы секретаардарынан быыбыардаабыттара. Бастыҥ үлэтин иһин Киин Комитет бочуотунай грамотатынан наҕараадаламмыта.

1957 сылтан Коммунистическай партия кэккэтигэр киирбитэ уонна олохтон туоруор диэри эрэллээх чилиэнинэн сылдьыбыта. 1958сыллаахха дойдутугар П.Алексеев аатынан колхуос парткомун босхоломмут секретарынан үлэлээбит, «Коммунизм» колхуос хонтуруоллуур, эрэбиисийэлиир комиссиятын бэрэсэдээтэлинэн таһаарыылаахтык үлэлээбит. Кэлин колхуостар сопхуоска уларыйыллыбыттарын кэннэ, Харбалаха, Чычымахха отделение управляющайынан, рабочкомунан, сопхуос дириэктэринэн пенсияҕа тахсыар диэри үлэлээбит.

Ити курдук эһээм Петр Гаврильевич оҕо эрдэҕиттэн норуот хаһаайыстыбатыгар араас салаатыгар үрдүк таһаарыылаахтык үлэлээбит, төрөөбүт оройуонун социальнай-экономическай сайдыытыгар дьоһун кылаатын киллэрсибит. Бииргэ үлэлээбит табаарыстара, доҕотторо кинини ураты чиэһинэйин, үлэтигэр бэриниилээҕин үрдүктүк сыаналыыларын туһунан суруйаллар, ахталлар.

 

 

Автор: А.М. Афанасьева