Колотинский Петр Гаврильевич (1928 г.р.)

 

Мин хос эһээм Колотинский Петр Гаврильевич, 1928 сыллаахха Тааттаҕа төрөөбүтэ, үлэ, тыыл бэтэрээнэ, Таатта улууһун бочуоттаах гражданина, 4 кинигэ ааптара.

Аҕата Гавриил Терентьевич Колодезников сэриигэ баран, 1942 сыл сэтинньи ыйыгар Тибиэр куорат анныгар улахан кыргыһыыга геройдуу охтубута. Көмүс уҥуоҕа Тверской уобалас Зубцовскай оройуонун Пищагино дэриэбинэтиттэн 300 м. соҕуруу көмүллэн сытар.

Ийэтэ Варвара Михайловна Колодезникова сэрии сылларыгар «Ворошилов» колхозка дайаарканан үлэлээбитэ.

Хос эһээм 13 саастааҕар аҕата сэриигэ барбыта. Кини икки балтылаах уонна бырааттаах дьиэҕэ аҕатын солбуйа, ийэтигэр сүрүн көмөлөһөөччү буолан хаалбыта.

Сэрии сылларыгар кини көлүөнэтэ сут-кураан кэмнэргэ фроҥҥа барбыт убайдарын, аҕаларын солбуйан колхос үлэһиттэрэ буолбуттара.

Мин хос эһээм 1945 сыллаахха от охсуутугар Өрөспүүбүлүкэтээҕи күрэхтэһиигэ кыайан, бастыҥ от охсооччу аатын сүкпүтэ кини төһүү үлэһит буоларын мэктиэлиир. Ону таһынан таһаарыылаах, бэриниилээх үлэһит буоларын туоһулуур наҕараадалардаах: «Улуу сэриигэ килбиэннээх үлэтин иһин», «Үлэ туйгуна» мэтээллэр уонна Саха АССР Верховнай Сэбиэтин Президиумун Бочуоттаах грамотата.

Сэрии кэннэ хос эһээм Чурапчытааҕы педучилищены бүтэрэн баран 5 сыл учууталлаабыта, ол кэннэ совхоска, колхозка салайар үлэҕэ үлэлээбитэ. Бочуоттаах сынньалаҥҥа олорон 1 ахтыы кинигэ, 2 хоһооннор уонна 1 оҕолорго аналлаах булт туһунан кэпсээннэрдээх кинигэлэри суруйан хаалларбыта. Кини айымньылара сүрүннээн үлэҕэ сыһыан уонна олох кэрэтин туһунан буолаллар.

Хос Эбээбинээн Филиппова Татьяна Владимировналыын 56 сыл бииргэ олорбуттара. Кинилэр олохторун билигин 6 оҕолоро, 13 сиэннэрэ, элбэх хос сиэннэрэ салҕыыбыт.

Хос эһээбит дьоҥҥо, үлэҕэ сыһыанын туһунан ийэбиттэн, эбээлээх эһээбиттэн, аймахтарбыттан истэн, кининэн киэн туттабын.

Мин хос эһээм

Колотинский Петр Гаврильевич, кыайыыны уһансыбыт килбиэннээх үлэтэ, үтүө майгыта үйэлэргэ умнуллубат!

 

 

 

Автор: Л.Владимирова, ученица 6 класса.