Кобякова Татьяна Филипповна (1937 г.р.)

                                                     

Эбээбит, Кобякова Татьяна Филипповна 1937 сыллаахха от ыйын 2 күнүгэр, түөрт оҕолоох Кобяковтарга үһүс оҕонон, кэрэ айылҕалаах Кэбээйигэ күн сирин көрбутэ. Оччотооҕу сут-кураан, сэрии кэмнэрин баттаһа улаатан, оонньооботох оҕо сааһа таптыыр Кэбээйитигэр ааспыта. Оччотооҕу аас-туор олох, оҕо-дьахтар диэн араарбат ыарахан түбүктээх үлэ, сиэмэ ыһыыта, сиик-туман түһүөр диэри оттооһун, сүөһү көрүүтэ,биьиги эбээбитин  тумнубатахтара. Татьяна Филипповна үйэтин сааһын тухары сопхуоска араас үлэҕэ үлэлээбитэ. Ол курдук  эдэркээн, оскуоланы саҥа бүтэрбит, комсомолка кыыһы “Кыһыл Кэбээйи” диэн тэйиччи турар учаастакка, бэйэтиттэн балыс кыыһы кытта борооннору көрдөрө ыыталлар. Ол онно үлэ ыараханын эттэринэн- хааннарынан биллэллэр да, биирдэ даҕаны үлэлэрин бырахпакка, аккаастаабакка, тулуурдаахтык, дьаныардаахтык  үлэлээбиттэрэ. Кинилэргэ отторун биирдэ эмит киирэн Былатыан диэн аҕам саастаах киһи тиэйэн бэлэмниир эбит. Онуоха икки эдэркээн кыргыттар отторун бэйэлэрэ оросчуоттаан сүөһүлэрин аччыктаппакка, биири да энчирэппэккэ кыс таһаараллара. Доҕор кыыһа кыра буолан чүмэчи тутааччыннан, кыра сыыр-мыыр үлэлэргэ көмөлөһөрө эбитэ үһү. Эбээм бэйэтэ да аһыныгас буолан, балтын харыстыыр эбит. Сарсыардаттан мастарын эрбэнэн,хайытан,оһохторун оттон, биирдэ эмит бөһүөлэккэ киинэ көрө кэлэллэр эбит сатыы. Онтон аны киинэ кэннэ түүннэри төннөллөр эбит. “Биирдэ даҕаны айыккалаабат, сурэҕэлдьээбэт эбиппит”- диэн эбэм кэпсээччи. Оччотоо5у оҕолор,сайын атах танастарын харыстаан атах сыгынньах сылдьаллар эбит. 1961 с.  эбээбит эһээбитин, олоҕун аргыһын, Дьяконов Иван Алексеевичы   көрсөн ыал буолаллар. Кинилэр дьиэ-уот тэринэн, аҕыс оҕону төрөтөн улаатыннарбыттара, барыларын атахтарыгар туруораран, оҕолоро билигин бары араас идэлээх, үлэлээх, элбэх оҕолоох ыаллар. Эбээлээх эһэм, сүөһү-сылгы ииттэн, быр-бааччы 40-тан тахса сыл устата иллээх-эйэлээх үлэһит дьиэ-кэргэн буолан дьоллоохтук олорбуттара.   1961 с. эбээбит “Кэбээйи” сопхуоһугар дайаарканнан үлэлии киирбитэ. Тэрилтэҕэ үлэлиир тэҥинэн, дьиэ-уот тэринэн, ынах- сүөһу, сылгы иитэн,  уу кырбас аҕыс оҕону көрөн улаатыннарбыттара. Оҕону көрөн олорорго, ол кэмҥэ уһуннук олордубаттар этэ, оннооҕор аҕыйах хоноот үлэтигэр таһаараллар эбит. 1969 с. эбээбит оҕо саадыгар оһох оттооччунан, сайынын хортуоппуй, турнепыс, хаппыыста олордон ону көрөөччүнэн, кыһынын ол овощехранилищеҕа оһох оттооччунан, суортааччынан үлэлээбитэ. Эбээбит сүрдээх тулуурдаах, үлэни өрө тутар улэһит этэ. Үлэтин иһин хайҕабыл суруктардааҕа да хомойуох иһин сүппүттэр. Эбээбит оҕолорун батыһыннара сылдьан от бөҕө оттууллар эбит. Ол саҕана хас биирдии киһи, оҕолуун-улаханныын бары “зеленка” диэн от оттоон туттарар эбээһинэстээхтэр эбит. Онон кылгас сайыҥҥа бэйэлэрин отторун таһынан 10 киһи нуорма отун сопхуоска туттараллара.

Эбээбит, Татьяна Филипповна майгылаах мааныта, үлэһит үтүөтэ, иистэнньэҥ бастыҥа, асчыт ааттааҕа буолан бачча элбэх оҕону  барыларын көрөн- харайан уулаатыннардаҕа. Кини олус иистэнньэҥ уонна хаһаайстыбаннай өйдөөх-санаалаах  буолан, төһө да ас-таҥас кэмчи сыллара ааспыттарын иһин биирдэ да, оҕолоро аччыктаабатахтар, алдьаммыт таҥастаах – саптаах сылдьыбатахтар.  Элбэх дьүөгэлээҕэ, куруук күлэ-үөрэ сылдьара. Эбээбитин сүрдээх уус-уран тыллаах, олус ыалдьытымсах, кыраттан үөрэр, дьоҥҥо сыһыана наһаа учугэй этэ диэн дьон-сэргэ ахтар-саныыр.

 

Кобякова Татьяна Филипповна үлэ уонна тыыл бэтэрээнэ, “Ийэ албан аата” диэн  III истиэпэннээх, “Ийэ буолуу” мэтээллэрдээх.

Оҕолорун, сиэннэрин, күтүөттэрин ааттарыттан Нь. И Дьяконова кыыһа, Кэбээйи улууһун олохтооҕо уонна сиэнэ Н. П Антонова омук тылын учуутала суруйдулар