Кобякова Анна Андреевна

Мин хос эбээм, ийэм эбээтэ Анна Андреевна Кобякова. Кэбээйи улууһуттан төрүттээх. Кини элбэх оҕолоох Тереховтар улахан кыыстара. Күн сирин олунньу ый 12 кунугэр 1916 сыллаахха көрбүт.

Төрөппүттэрэ сэмэй, үлэһит, дьон сэргэ ытыктыыр дьонноро эбиттэр. Аҕата мас, тимир, көмүс ууһунан биллибит киһи, дэлэҕэ даҕаны кинини Күкүр Уус диэн ааттаатахтара. Аҕатын талаанын утумнаан, мин хос эбээм, тарбаҕар талаанаах, бэйэтин дойдутугар киэҥник биллэр иистэнньэн этэ. Бастаан ийэтигэр көмөлөһөн, ону-маны абырахтаан, кыралаан иистэнэн саҕалаабыт.

Сэрии ыар сылларын саҕаланыытыгар, кэргэнинээн, улахан кыыстарынаан Сангарга олорбуттар. Иккиэн шахта5а чох хостооһунугар үлэлээбиттэр. Хос эһээм Григорий Анисимович сэриигэ ыҥырыллан барбытыгар хос эбээм оҕотунаан дьонноругар чугаһаан Кэбээйигэ көспүттэр.

Ол сэрии сылларыгар, дьонтон хаалсыбакка, туох да үлэттэн толлубакка Колхоз бары үлэтигэр бурдук да хомууругар, сүөһү көрсөн, от оттоон, мас мастаан үлэлээбит. Иистэнэр буолан нэһилиэгин дьонун ичигэс таҥастаан, элбэхтик иистэнэн, үлэлэлээн олорбутун дьон астына, махтана саныыллар. Сэриигэ кэргэнэ өлөн, соҕотоҕун хаалан бэйэтин оҕолорун, кырдьа5ас ийэтин, аҕа кыннын, балтытынаан, быраатын бэйэтин тарбаҕын талаанынан иистэнэн, иитэн, аһатан сэрии ыарахан сылларын мүччү түспүттэр.

Сэрии кэнниттэн, кини оройуоннааҕы быткомбинатка бастаан иистэнньэн, онтон таҥас кырыйаччынан үлэлээбит. Үөрэ5э суох эрээри бэйэтин толкуйунан, суоттааһынынан ньэмиэттэри судургутук оҥорор үһү. Үлэлиирин тухары дьон махталын, хай5алын ылбыт.

Пенсия5а тахсан да баран тулуйан тэһийэн олорботох. Салгыы идэтин сайыннаран түүлээх таҥас тигиитин баһылаабыт, унтуу, саҕынньах бөҕөтүн тикпит. Дойдутугар кинини билигин да өйдүүллэр, саныыллар. Оҕолоро, сиэннэрэ тиийэн Күннэй Аана ыччатабыт диэтэхтэринэ билэллэр.

Хос эбээм Анна Андреевна үтүө майгылаах, дэгиттэр талааннаах, киһи киэн туттар киһитэ. Кэбээйигэ кини туһунан музейга стенда баар, Быткомбинат туһунан кинигэ кини ааттыттан саҕаланар.

Мин хос эбээбинэн киэн туттабын.

А. Львов, 4 кылаас уерэнээччитэ.