Кириллина Варвара Ивановна

(1920 г.р.)

Мин хос эбэм, Кириллина Варвара Ивановна 1920 сыллаахха Таатта улууһун 1 Алдан нэһилиэгэр элбэх оҕолоох, дьадаҥы дьиэ кэргэҥҥэ төрөөбүтэ. Аҕата, Колодезников Иван Михеевич, кини үс саастааҕар өлөн элбэх оҕо иитиитэ соҕотох ийэҕэ сүктэриллибитэ, олортон кэлин үс эрэ оҕо хаалаахтаабыттар. Ийэтэ Колодезникова Феврония Тимофеевна бастакы колхозтаах этэ. Кини 1930 сылтан ыанньыксытынан, бороон көрөөччүнэн үлэлээбит. Хос эбэбит уонча сааһыттан торбос көрүүгэ, ынах этэриигэ илии атах буолан улахан көмөһөөччү буолбут. Онтон 14 сааһыттан бэйэтэ субан сүөһү көрөн, хонуу араас үлэтигэр үлэлээн барбыт. Эбэбит 1931 сыллаахха оскуолаҕа киирбитэ. Оччотооҕуга Уус Тааттаҕа түөрт эрэ кылаас баара. Онтон салгыы Уолбага баран үөрэнэллэр эбит. Эбэбит төһө да салгыы баран үөрэммэтэр олус үчүгэйдик ааҕар, ахсааны суоттуур буолбут. 1941 сыллаахха Аҕа дойду кырыыстаах сэриитэ сааламмытын дойдуларыгар сылдьан истэн аймаммыттар. Хос Эбэм дойдутугар Тааттаҕа суол оҥоруута курдук ыарахан үлэҕэ сылдьыбыта. Үлэ кытаанаҕа онно этэ. Сарсыарда эрдэттэн киэһэ хараҥарыар диэри эт илиилэринэн үлэлииллэр эбит. Кыһыҥҥы тымныыга ордук ыарахан буолара диэн ахтар эбит мин хос эбэм. Тохсунньу томороон тымныытыгар, олунньу омуннаах туманыгар суол ханаабатын хаһыы, Таатта үрэҕиттэн оҕуһунан уу таһыы, бэрэбинэ тиэйии ордук ыарахан этэ диирэ. 1964 с. ССРС Верховнай Советын президиумун 17.08.1964с. укааһынан, Председатель А.Микоян, Секретарь М.Георгадзе илии баттааһыннаах, эбэбитигэр 10 о5ону төрөппүтүн уонна ииппитин иһин «Герой Ийэ» бочуоттаах аат иҥэриллибитэ.

Наҕараадалара: Сэрии сылларыгар кыайыыны уһансыбыт кылаатын иһин юбилейнай мэтээллэр

Автор: А. Протопопов