Кириллина Мотрена Семеновна

Мин киэн туттар хос эбэм — Матрена Семеновна.

Хос эбэм, Кириллина Мотрена Семеновна 1920 сыллаахха тохсунньу 20 күнүгэр күн сирин көрбүтэ.

Эбэм 1941 сыллаахха эһэбинээн Дмитрий Алексеевичтыын ыал буолан 3 кыыс, 7 уол оҕолонон нэһилиэк биир кырдьаҕас, ытык ыаллара буолан, 48 сыл эн-мин дэһэн бииргэ олорон кэлбиттэрэ.

Сэрии ыар сылларыгар 1942 сыллаахха Чурапчы улууһун улэ фронугар диэн күүс өттүнэн Хоту көһөрүү сылларыгар эбэм эһэбин кытта кыра оҕолорун илдьэ Кэбээйи улууһугар Сииттэҕэ көһөн тиийэн балык уустук үлэтигэр күүстэрин харыстаабакка үлэлээбиттэр.

Үлэ ыараханыттан, дьиэ-уот тымныытыттан, аһыыр ас тиийбэтиттэн бары кэриэтэ хоргуйбуттар, ыалдьыбыттар.

Бу ыар, кыһалҕалаах кэмнэргэ эбэм биир дойдулаахтарыгар бары өттүнэн күүс-көмө буолбут.

Ол курдук Александра Тарабукина кэпсииринэн: тииһим килэйэн, ойоҕоһум уҥуоҕа атыгыраан бырдам быстан, күн сириттэн күрэнэр муҥур уһукпар тиийэн сыттахпына Мотуруона Семеновна баар буолан, көрөн-истэн, аһатан-сиэтэн, эмтээн-томтоон бэттэх аҕалбыта. Олох олорор дьолум тардан, күн-ый буолан абыраабыта. Ол миигин эрэ буолуо дуо, элбэх киһини, оҕону быыһаабыта … диэн ытамньыйа-ытамньыйа кэпсиирэ, махтанара үһү.

Бу санаатахха, төһөлөөх элбэх Чурапчы дьоно, оҕото-уруута бу сэрии ыар сылларыгар тоҥон-хатан, аччыктаан өлбүттэрэ буолуой, ыарахан да күннэр-дьыллар ааспыттар…

Эбэм күнү быһа балыкка үлэлээн сылайдар даҕаны уус тарбахтаах иистэнньэн буолан балыкка үлэлиир дьоҥҥо түүннэри иистэнэн үгүс-элбэх сылаас үтүлүк, кээнчэ, сон-ыстаан, таҥас-сап тигэн биэрэрэ үһү.

Амарах санаалаах, айыы дууһалаах эбэм дьоҥҥо наар үтүөнү эрэ баҕарара, туох баарынан дьонугар — сэргэтигэр сүбэ-ама, күүс-көмө буолар этэ диэн үөлээннээхтэрэ махтанан кэпсииллэрэ.

Биһиги аймахтан сэрии, көһөрүү ыар сылларын эрэйин-кыһалҕатын улахан эдьиийдэрим, мин эһэм, аҕам аҕата Эверстов Дмитрий Дмитриевич кып кыра санныларыгар сүкпүттэр эбит.

Мин күндү хос эбэбин мэлдьи өйдүү-саныы сылдьыам.

Автор: А. Эверстов, 10 кылаас