Иванова Варвара Семеновна (1922 г.р.)

1922 сыл олунньу 25 күнүгэр Мэҥэ-Хаҥалас улууһугар 1 Нөөрүктээйи нэһилиэгин орто сэниэ ыалыгар Өлөксөөс уонна Сэмэн Кириллиннэргэ бэһис оҕоннон төрөөбүтэ.

Улахан убайа Ньукулай Аҕа дойдуну көмүскүүр сэриигэ ыҥырыллан баран сэрии толоонугар охтон дойдутугар төннүбэтэҕэ. Эдьиийдэрэ Балыгыас, Өлөксөөс уона Мавра дьиэ-уот тэринэн, ыал буолан Хараннан, Майаннан уонна Бөкөннөн олорбуттара. Оттон бырааттара, кэргэннэрин дойдуларыгар олохсуйбуттара, Оппуонньа – Уус Алданҥа, Ньукулай – ыраах Украинаҕа.

Варвара Семеновна кыргыттартан балыстара этэ, оҕо сааһа “Саҥа олох” холкуос сиригэр-уотугар Аалаахха Тураҥнаах алааска ааспыта. Улаата түһэн баран Ой-Бэскэ церковно-приходской оскуолаҕа үөрэммитэ. Манна ааҕар-суоттуур буолбута.

Онтон Аҕа дойдутун сэриитэ саҕаламмытыгар 19 саастаах кыыһы Майаҕа МТС-ка трактор курсугар ыҥыран үөрэтэллэр. Курсун бүтэрэн Хараҕа “Сталин” колхозка трактористыыр. Манна бааһына хорутуутугар, бурдук ыһыытыгар үлэлээбитэ. Кыһынын мастарыстыайга үлэлиир буолаллара. Манна билбитэ дьиҥнээх үлэ ыараханын. Бэйэтин курдук тракторист дьүөгэлэринээн “барыта Кыайыы туһугар!” диэн ыҥырыыннан салайтаран бары биир киһи курдук күргүөмүнэн, туох баар күүстэрин-уохтарын ууран туран олус дьаныардаахтык үлэлээбиттэрэ. Бу сылларга таһаарыылаах үлэтин иһин махтал суруктарынан наҕараадаламмыта. МТС бочуоттаах дуоскатыгар тахсыбыта.

Сэрии бүтэр сылыгар Дьокуускайга школа-механика үөрэтэ ыыталлар. Онно комбайнер идэтин ылар.

Бу сылдьан куоракка Аҕа дойду сэриититтэн кэлбит, Ньурбаттан төрүттээх, олоҕун аргыһын, Иванов Петр Петровиһы кытта билсэр. Сотору кэминэн, эдэрдэр олохторун холбоон ыал буолаллар.

Варвара Семеновна уһун дьоллоох олоҕу олорбута, 4 кыыс 2 уол оҕо күн күбэй ийэтэ, элбэх сиэн эбээтэ, хос эбээтэ буолбута.

Олоҕун тухары үлэҕэ бэриниилээх, чиэһинэй этэ.

А. Индеева, 7 кылаас