Иванов Иван Дмитриевич (1923 – 1985)

1923 сыл ыам ыйын 1 күнүгэр Элгээйигэ Ксенья Даниловна, Дмитрий Григорьевич дьиэ кэргэннэригэр бастакы оҕонон төрөөбүтэ. Алта саастааҕар – быраата Коля, 3 саастааҕар ийэлэрэ өлөн, аҕаларынаан эрэ хаалбыттара. Онон кинилэри ийэлэрин балта Мария Даниловна харайсыбыта. Эһэбит Миитэрэй бастакы тырахтарыыстартан биирдэстэрэ этэ. Эһэбит 7 кылааһы бүтэрэн, интэрнээт-оскуолаҕа иитээччинэн, комсомуол сэкирэтээринэн үлэлээбитэ. Аҕа дойду сэриитин уонна тыыл, үлэ бэтэрээнэ.

Сэрии кэнниттэн 1950 сыллаахха сүрэхтэринэн сөбүлэһэн, харахтарынан хайҕаһан, дьоллорун холбоон, эмиэ бэйэтин курдук ийэтэ эрдэ өлбүт тулаайах аҥардаах, Хороттон төрүттээх Матрена Марковна Кириллиналыын (норуокка биллэр аата Нотуус) ыал буолбуттара, Элгээйигэ олохсуйбуттара.

Оччотооҕута биир сыллаах дьиҥнээх суоппар үөрэҕэ Дьокуускайга эрэ баар буолан, аҕабыт үөрэнэ борохуотунан куораттаабыт. Үөрэҕин бүтэрээт, 1 Бордоҥҥо, ол эбэтэр Элгээйи МТС-һын дириэктэригэр суоппардаабыта. Онтон «Элгээйи» сопхуос Ленин уордьанын ылбыта, Никандр Никифорович Павловка суоппардаабыта. Кэлин Элгээйи отделениетыгар суоппардаан, Толоонтон Күндэйэҕэ диэри баар сайылык пиэрмэлэриттэн күн ахсын сопхуос сүөгэйин Элгээйигэ – арыы собуотугар тиэйэр массыынаҕа үлэлээбитэ. Ол сылдьан оҕолоругар хортууһугар хомуйан, кыра да буоллар, дьэдьэн кэһиилээх кэлэрэ.

Биһиги билигин эрэ өйдүүбүт, оччотооҕуга сайыҥҥы пиэрмэлэргэ сылдьарга уулаах, бадарааннаах, силистэрдээх,  нэксиэлээх суолларынан сарсыарда алта чаастан киэһэ үлэ чааһа быдан бүппүтүн кэннэ төһөлөөх сылайан-элэйэн дьиэтин буларын…

1963 сыллаахха «Коммунистическай үлэ ударнига» буолан, «За долголетнюю безупречную и безаварийную работу в течение 22 лет в качестве шофера» диэн суруктаах Бочуотунай кырааматанан наҕараадаламмыта. 1974 сыллаахха «Москвич — 412» массыына пуондатын анаабыттарыгар эһэбит олус да үөрбүтэ, биһиги да онтон хаалсыбатахпыт. Отторугар – мастарыгар, кэлэллэригэр-баралларыгар бары массыыынатынан сылдьаллара .

Эбээлээх эһээбит тулаайах аҥардаах буоланнар, айылҕабыт төһөнү биэрэринэн оҕолонобут диэн, утуу-субуу 13 оҕону (9 кыыһы, 4 уолу) төрөппүттэрэ.

Уон үс оҕоттон биир да бэрээдэги кэспит оҕо диэн суох. Икки тулаайахтар 13 оҕо төрөөн, 46 сиэннэннилэр. Эһэбит  ыам ыйын 1 күнүгэр – төрөөбүтэ 100 сыла. Бу үбүлүөйдээх  сылы көрсө 100-с хос сиэн күн сирин көрбүтэ.

Эһэбит Иван Иванович 22 сыл устата эҥкилэ суох суоппардаан, икки төгүл «Коммунистическай үлэ ударнига» үрдүк ааты ылбыта, хомуньуус баартыйа чилиэнэ. Биһиги эһээбитинэн киэн туттабыт, ытыктыыбыт, таптыыбыт, суохтуубут.

Э. Матаннанова , 6  кылаас