Христофорова Александра Алексеевна 

94 саастаах ытык кырдьаҕас.

11 оҕолооох Герой Ийэ, элбэх сиэннэрдээх, хос сиэннэрдээх.

Таатта улууһун, Баайаҕа нэһилиэгин Бочуоттаах олохтооҕо, тыыл бэтэрээнэ, сэрии кэмин о5ото знак хаһаайына.

Наҕараадалара:

  • Үлэ бэтэрээнэ
  • Тыыл бэтэрээнэ
  • Сэрии сылын оҕото
  • Сэрии бэтэрээнэ (2004 сылтан «О ветеранах» ФЗ олоҕуран)
  • Герой – ийэ
  • «Медаль материнства» мэтээл хаһаайката
  • «Материнская слава» 1 истиэпэннээх уордьан хаһаайката
  • «Материнская слава» 2 истиэпэннээх уордьан хаһаайката
  • «Материнская слава» 3 истиэпэннээх уордьан хаһаайката
  • «За вклад в развитие семейной политики РС (Я)» бэлиэ хаһаайката
  • Улуустааҕы «Холумтан сылааһа» Дьиэ – кэргэн сылыгар аналлаах көрүү – конкурс кыттыылааҕа
  • “Баайаҕа нэһилиэгин Бочуоттаах олохтооҕо” анал аат (бэлиэ) хаһаайката
  • «Таатта улууһун Ытык кырдьаҕаһа» Бочуоттаах аат (бэлиэ) хаһаайката
  • Элбэх Бочуотунай грамоталар, үбүлүөйүнэй мэтээллэр хаһаайкалара

Мин Баайаҕа нэһилиэгэр 1931 сыллаахха тохсунньуга Ульяна Гаврильевна, Алексей Федорович диэн холкуостаах кэргэҥҥэ сэттис оҕонон төрөөбүтүм. Төрөппүттэрим Андросовтар элбэх оҕолоох буоланнар, миигин төрүүрбүн кытта үс хонуктаах оҕону Луковцев Павел диэн киһиэхэ ииттэрэ биэрбиттэр. Түөрт сааспар ииппит аҕам өлөн, дьонум төттөрү ылбыттар.

Сэрии саҕаланар сылыгар уоннаах кыыс этим. Оччолорго Айан Көрдүгэнэ диэн сиргэ олорор этибит. Сэрии буолбутун сайылыкпытыгар Ньиидьигийэҕэ олорон истибиппит. Күтүөппүт Байбал сэриигэ барбыта. Айманыы, ытабыл-соҥобул бөҕө, дьоммутун Саҥа – Олохтон, ородобуойтан, атаарбыппыт.

Ити сайын куйаас сатыылаабыта, ардах түспэт, курааннаан аһыҥалар сэрбэйэри барытын сиэн, от үүммэтэҕэ. Эдьиийбинээн Ылдьааналыын Көлбөхтөөххө былахтаан кэбиһэбит, ону тиэйэллэрэ.

Күһүнүгэр Томторго үөрэнэ кэлэбин, Луковцев Көстөкүүннээххэ олоробун. Кинилэргэ дьиэлэнэн элбэх оҕо олорбута. Кыра бурдук сыыһа өйүөлээхпин кэмчилээн, биир киилэлээх миискэҕэ хааһылаан баран киэһэ, сарсыарда сиибин.

Саҥа үөрэнэн истэхпинэ, дьонум от сии Кириэскэ көһөр буоланнар, үөрэхпиттэн уурайан, онно көсүһэр буоллум. Ол аата сүөһү аһата диэн бардыбыт. Сүөһүбүтүн көрөн кыстаатыбыт эрээри, сүөһү бөҕө өллө. Кыстаан олордохпутуна, күтүөппүт Максыым Мөлөкүүрэп өлбүтэ, ону харайар кыах суох буолан, чигдигэ таһааран хаарынан көмөн кэбиспиппит. Саас, халлаан арыый сылыйбытыгар, Влас буору булларбыта. Ити саас убайдарым Влас уонна Миитэрээс аармыйаҕа барбыттара.

Сайын төттөрү көһөн кэллибит, наар сатыы айанныыбыт. Куһаҕан үчүгэйдээх диэбиккэ дылы, ынахтарбыт үүттэриттэн аһааммыт хоргуйбатыбыт. Кэлээт, эмиэ үлэ үрдүгэр түстүбүт: оттооһун, оҕус сиэтиитэ, сир паардааһына уо.д.а.

Кыайыы сыл Томторго үөрэнэ сылдьар этим. Кыайыы буолбутун, сэрии бүппүтүн Хочоенова Мария (Харитонова Настя ийэтэ) Саҥа – Олохтон кэлэн биллэрбитэ. Томторго араадьыйа да, төлөпүөн да суоҕа. Үөрүү – көтүү бөҕө буоллубут, сэрииттэн дьоммут кэлбиттэрин курдук санаатыбыт. Миитин, дакылаат бөҕө этэ.

Кыайыы ыһыаҕа Ньиидьигийэҕэ буолбута, киһи бөҕө мустубута, ас бөҕө астаммыта. Аны, Андросов Дьөгүөр Иннокентьевиһы куоракка табаах ыллара ыыппыттара, ыһыаҕы баттаһа кэлбитэ.

Ийэбит, эбээбит, хос эбээбит устар уһун олоҕун кэрэһиттэрэ – кини наҕараадалара

1952 сыллаахха ыал буолан, 11 оҕону төрөтөн-иитэн, Герой Ийэ Бочуоттаах аатын иҥэрбиттэрэ. Мин оҕолорум бука-бары үөрэхтээх, үлэһит, ньир-бааччы ыал буолалларыгар баҕарабын. Оҕолор үөрэнэллэригэр кыах бөҕө баар. Үчүгэйдик, дьоллоохтук, эйэлээхтик олорорбут буоллар, онтон ордук үөрүү биһиэхэ суох буолуо этэ.

 

 

Ахтыы ааптара А.А. Христофорова