Гуринов Николай Прокопьевич

«Киһи норуотугар туһата үйэ уһунунан буолбакка,

үлэ үйэлээҕинэн кэмнэнэр-кээмэйдэнэр»

Суорун Омоллоон

Үтүөкэн да үлэһиттэр

Күндэйэҕэ олорбуттар,

Кинилэри үйэтитэр

Кинигэлэр таҕыстылар.

Айылҕаттан айдарыылаах

Аас тырахтарыыс убайбыт

Үгүс доҕордоох, атастаах

Олоҕу олорон ааспыт.

Аҕата гвардеец саллаат

Арҕаа фроҥҥа охтубут,

Дьоһун киһи, элбэх ыччат

Буойун олоҕун салҕаабыт.

Таһаарыылаах үлэтинэн

Хайҕаммыта биллибитэ,

Үрдүкү Сэбиэт бэлиэтээн

Үс Грамотаны биэрбитэ.

Биир дойдулааҕын аатынан

«Күүстээх Күүрүнэп» диэбиттэр,

Бары өттүнэн астынан

ВДНХ-ҕа ыыппыттар.

От оттоон, буола хорутан,

Тыраахтыра ньиргийэрэ,

Күндэйэлэрин үөрдэрэ…

Мин эһэм Николай Прокопьевич Гуринов 1935 сыллаахха ыам ыйын 22 күнүгэр от-мас силигилээн, ситэн турдаҕына, Ньукуолун күн Сунтаар улууһун Харыйалаах бөһүөлэгэр төрөөбүтэ.

Кини аҕата Прокопий Николаевич Аҕа дойдуну көмүскүүр Улуу сэрииттэн эргиллибэтэҕэ, ийэтэ эрдэ өлбүтэ. Эһэм сэрии аас-туор сылларын этинэн-хаанынан билбитэ, аччык аҥаардаах, оонньоммотох оҕо сааһы ааспыта, олох ыараханын эрдэ билбитэ. Кини сытыары-сымнаҕас, наһаа үлэһит, бүгүрү, бөдөҥ-садаҥ, аҕыйах саҥалаах, лоп-бааччы нүһэр киһи үһү. Николай Прокопьевич бэйэтин олус кыанар, туруору күүстээх киһи этэ. Ол иһин дьоно-сэргэтэ кинини Күүстээх Куурун диэн ааттыыллара. Хара тыаттан киирбэт чулуу булчут этэ. 1963 с. Эбээбин Татьяна Николаевна Федорованы көрсөн ыал буолан, тоҕус оҕоломмуттара: 5 кыыс уонна 4 уол.

Гуринов Николай Прокопьевич Күндэйэ нэһилиэгин, Ленин уордьаннаах «Элгээйи» сопхуос уонна Сунтаар оройуонун чөмпүйүөн тырахтарыыһа. Кини бэйэтин кэмигэр, Сэбиэскэй былаас саҕана аатырбыт тырахтарыыс, сопхуос үлэтигэр сайыннары-кыһыннары, күнүстэри-түүннэри биир да күн өрөөбөккө үлэлээн, үрдүк көрдөрүүнү ситиһэн, үлэҕэ дьулуурдаах, техиникэ үрдүк таһаарыылаахтык үлэлииргэ бары өттүнэн дьоҕурдаах буолан республикаҕа 3-с миэстэҕэ тиксибитэ.  1977 сыл сайын толору механизациялаах звено салайааччытынан, 1963 сылтан «ДТ-75» тракторга тракториһынан үлэлээбит Н.П. Гуринов РСФСР үтүөлээх механизатора Василий Исаков айбыт стогообразователинэн 7 киһилээх звенону салайан, хас биирдии отчукка 170-уу (сүүс сэттэ уоннуу) туонна оту оттоон сопхуоска туттарбыттара, дьиҥ ситиһиллибит баар чахчы. Николай Прокопьевич Гуринов итинник стогообразователинэн субууттан оту транспортер көмөтүнэн хомуйтаран, кэбиһиигэ ити ньыманы оройуоҥҥа аан бастакынан олоххо киллэрсибит оройуон чулуу механизатордарыттан биир бастыҥнара этэ.

Николай Прокопьевич көрдөрүүлээх үлэтин иһин, үс төгүл Саха АССР Үрдүкү Сэбиэтин президиумун Бочуотунай Грамотатынан наҕараадаламмыта. Гуринов Николай Прокопьевич бэйэтэ ыар оҕо сааһын ааспыт, олох дьиҥ араас эриирдээх-мускуурдаах дьылҕалаах суолун этинэн-хаанынан билбит, араас үлэҕэ уһаарыллан, бэйэтин тус олоҕор эрэ буолбакка, бүтүн нэһилиэгэр, оройуонугар, өрөспүүбүлүкэтигэр ХХ үйэ үлэ рекордсменын аатын олохтоспут киһи.

ХХ үйэ рекордсмена, үлэ уонна тыыл бэтэрээнэ

Автор: М. Гуринова,  3 «б» кылаас үөрэнээччитэ