Гурьев Михаил Федорович (1926 г.р.)

 

Мин хос эhэм Гурьев Михаил Федорович

Мин хос эhээм Гурьев Михаил Федорович сэрии, ʏлэ ветерана, 1926 сыллаахха Сунтаар улууhугар тɵрɵɵбʏт. Тɵрɵппʏттэрэ эрдэ ɵлɵннɵр тулаайах хааланнар аймахтарыгар иитиллэн улааппыттар. 1941 сыллаахха А5а дойду сэриитэ буоларыгар 15 саастаах уол таайын дьиэ кэргэнин кытта Υɵhээ Бʏлʏʏ Тоҥуотугар кɵмʏс  хостуур артыалга ʏлэлээбит. 1944 сылга 18 сааhын туолан сэриигэ ыҥырыллан бэбиэскэ туппут уонна бэс ыйыгар борохуотунан Бʏлʏʏ, Лена ɵрʏстэринэн устан Мальта куоракка байыаннай чааска тиийэн сулууспатын са5алаабыт.

Кини сулууспалыыр байыаннай чааhа Илиҥҥи границаны кɵмʏскʏʏр уоттаах сэриигэ хорсуннук сэриилэhэн Япония сэриилэрин утары кыайыы ɵрɵгɵйʏн туппуттара. Мин хос эhээм сэриигэ минометчик этэ, демобилизацияланан сержант званиелаах. Сталинтан Благодарность суруктаах, «За победу над Японией мэдээллээх кэлбитэ. Сэрии кэннэ эйэлээх олоххо Υɵhээ Бʏлʏʏгэ эргиллэн кэлэн милиция отделыгар ситиhиилээхтик ʏлэлээбитэ.

1951 с. хос эбээбитин Υɵhээ Бʏлʏʏ Тоҥуо Куунуттан тɵрʏттээх Егорова Ксения Петровнаны кɵрсɵн, ыал буолан 5 о5о тапталлаах тɵрɵппʏттэрэ буолбуттара. Билигин элбэх сиэннэр, хос сиэннэр, хос хос сиэн кинилэр олохторун сал5ыыллар.

Сэрии, ʏлэ ветерана элбэх ахсааннаах на5араадалардаах, махтал суруктардаах. Υлэ5э, спортка, общественнай ʏлэ5э наар инники кэккэ5э сылдьыбыта. Спортка Υɵhээ Бʏлʏʏ оройуонун кɵмʏскээн 1960 с. Республиканскай мотоспорт кʏрэ5эр кыттан 2 миэстэ буолбута. Ыhыахтарга, тэрээhиннэргэ, мас тардыhыытыгар, гиирэ анньыытыгар, тустууга куруук кыттара. Сорсуннаах булчут, балыксыт этэ. Таhынаа5ы ыалларыгар булгу булдун аhыттан бэрсэр, кʏhʏҥҥʏ муҥха соботунан кʏндʏлʏʏрэ. Мин ветеран хос эhээбинэн киэн туттабын уонна эйэлээх оло5у саа саадах тутан кɵмʏскэhэн бэлэхтээбитинэн махтанабын.

О5олорун ахтыылара:

Улахан кыыhа, мин эбээм Светлана Михайловна – биhиги аҕабыт Гурьев Михаил Федорович 1926 сыллаахха дьадаҥы дьиэ кэргэҥҥэ тɵрɵɵбʏт, аас-туор аччык сылларга тɵрɵппʏттэрэ эрдэ ɵлɵн тулаайах хаалан аймахтарыгар иитиллибит. Сэрии, ʏлэ ветерана, олоҕун устата араас ʏлэҕэ ситиhиилээхтик ʏлэлээбитэ, спортка сыстагас, булчут, балыксыт бэрдэ этэ. Сэмэй майгылаах, чиэhинэй, эппитин толорор, убаастабылга сылдьара. Улахан дьиэ кэргэн аҕа баhылыга оҕолоругар, сиэннэригэр сымнаҕас, мɵ5ɵ этэ сылдьыбата, техникаҕа сыста5ас буолан мотоцикл, массыына кɵлɵлɵɵҕɵ, тыылаах уу мотуорунан сир астыы дьиэ кэргэнинэн сылдьарбыт. Араас сурунаал, хаhыат суруйтаран ааҕааччы, спидола радиоприемнигынан аан дойду сонуннарын истэн-билэн кэпсээччи. Оҕолоро аҕабытын олус убаастыырбыт, таптыырыбыт, олоххо ʏтʏɵ сʏбэhиппит буолара.

 

 

 

Хос сиэнэ В.Корякина 3 А кылааһын үөрэнээччитэ