Григорьева-Сергеева Евдокия Михайловна 1924 г.р

Биһиги хос эбээбит, эбээбит Людмила Александровна Попова ийэтэ, Григорьева-Сергеева Евдокия Михайловна 1924 с. Ньурба улууһун I Хаҥалас нэһилиэгэр күн сирин көрбүт. Ийэтэ барахсан эрдэ суох буолан эбээтигэр иитиллибит. Ньурба орто оскуолатын бүтэрбит.
Аҕа дойду сэриитин кэмигэр эдэркээн кыысчаан сылдьан Ньурбаҕа улахан дьону кытта тэбис тэҥҥэ холкуос араас үлэтигэр сылдьыспыт: от оттоон, хортуоска, хаппыыста, турнепс олордон, харайсан,ынах ыан. Онтон Дьокуускайга иитээччилэр курстарыгар үөрэнэн Тойбохой детдомугар үлэлээбит.Онно үлэлиир кэмигэр, эр киһи аҕыйах буолан, сүүрбэччэлээх эрэ кыыс соҕотоҕун атынан Ньурбаттан детдомҥа үөрэнэр тэрили аҕалан хас да сырыыга сылдьыбыт. Бүттүүн үөрэхтээһини киллэрэр саҕана улахан дьону ааҕарга-суруйарга үөрэппит.
Ити курдук Кыайыыны уһансыбыт хос эбээбит тыыл ветеранын аатын чиэстээхтик сүкпүтэ
Хос эбээбит Евдокия Михайловна ,Саха Республикатын Ньурба оройуонун Сергеевтэр учуутал утумнарын төрүттээччи, уордьана суох герой-ийэ,төрөөбут улууһун Мэнэдьэк нэьилиэгин үүнэр көлүөнэтэ үөрэх-сайдыы суолун тутуһарыгар дьоһуннаах олук уурсубут үтүөлээх.
Мэҥэдьэккэ кэлэн баран учууталынан, интернат иитээччитинэн ,сэбиэдиссэйинэн үлэлии сылдьыбыт.
Евдокия Михайловна оскуолаҕа киириэн иннинээҕи саастаах оҕолор саҥа тэриллэн үлэлээн эрэр тэрилтэлэригэр 1960 сыл хонуктаах буолбутугар бастаан иитээччинэн, онтон 1962-1976 сс. сэбиэдиссэйинэн үтүө суобастаахтык үлэлээн кэлбитэ.
Маҥнай үлэлииргэ олус ыарахана. Материальнай хааччыллыы мөлтөҕө,сөптөөх методическай көмө матырыйаал суоҕа,үлэһит штата аҕыйаҕа. 1965с.Евдокия Михайловна салайар оҕо саада дьааһыланы кытта холбоһон, дьааһыла –сад буолбута.1968 сыллаахха эбии биир бөлөх аһыллан 70 миэстэлэммитэ. Коллектив да улааппыта.Материальнай база да бөҕөргөөбүтэ.1971 сыллаахха эбии биир корпус тутуллан үлэҕэ киирбитэ.
Таһырдьа оҕо оонньуур площадкатын силигин ситэрэн оҥорторон кырачааттар доруобуйаларын харыстыырга улахан болҕомтотун уурара.Иитээччилэргэ үлэлиир-олорор усулуобуйаларын таба тэрийэн,кыргыттар бары иллээх баҕайытык биир санаанан ,айымньылаахтык үлэлииллэрэ.
Оҕолор чэгиэн-чэбдик,эт-хаан өттүнэн доруобай буолалларыгар,билии-көрүү өттүнэн сайдалларыгар Евдокия Михайловна үгүстүк түбүгүрбүтэ.1970 сыллаахха Ленин 100 сааһын туолар юбилейдаах сылыгар аналлаах куоталаһыы түмүгүнэн Хатыы деткомбината оройуоҥҥа бастыҥ үлэлээҕинэн билиниллибитэ.Евдокия Михайловна тус бэйэтэ өр сыллаах сыралаах үлэтэ сыаналанан В.И.Ленин 100 сааһыгар аналлаах «Үлэҕэ килбиэнин иһин»мэтээлинэн, “Социалистическай куоталаһыы кыайыылааҕа” диэн бэлиэнэн, нэһилиэк, оройуон грамоталарынан наҕараадаламмыта.
Евдокия Михайловна бэйэтэ нэһилиэк сэбиэтин үлэтигэр,хас да төгүл депутатынан талыллан ,быһаччы кыттыыны ылбыта.
Биһиги хос эбээбит Евдокия Михайловна детсадка заведующайдыыр эрдэҕинэ детсад коллектива иллээх- эйэлээх,түмсүүлээх, биир дьиэ кэргэн курдук коллектив буолан дьон-сэргэ хайҕалын,төрөппүттэр махталларын куруук ылааччы. Хатыы детсада оҕолорго дьоллоох оҕо сааһы бэлэхтээбитэ. Кэлин бу оҕолортон чаҕылхай талааннаах үтүө –мааны үлэһит дьон тахсыбыттара. Иитиллээччилэрэ билигин бары дьиэлээх-уоттаах,оҕолоох-уруулаах дьоһун- мааны дьон.
Тапталлааз кэргэнинээн Александр Васильевичтыын 8 бэйэлэрин оҕолорун, 3 сэрии тулаайаҕын атахтарыгар туруоран,туруу үлэһит дьон гыммыт биһиги хос эбээбитигэр ,Сергеева Евдокия Михайловнаҕа,тэҥнэһэр эҥкилэ суох Кэргэн ,Ийэ,Эбээ бу сиргэ бэрт аҕыйах буолуо!