Горохова Мария Никифоровна (1925-1987)

Мин хос эбээм Горохова Мария Никифоровна

Аҕам эбээтэ, мин хос эбээм Мария  Никифоровна  Горохова  1925  сыллаахха  Верхоянскай  оройуонугар  Табалаах  нэһилиэгэр төрөөбүтэ.

Мария Никифоровна 14 сааһыттан фермаҕа үлэлээбит, эрдэ тулаайах хаалбыт буолан ыалларынан сылдьан оҕо көрөн, хотоҥҥо илии-атах буолан улааппыт.  Аҕа дойду сэриитин кэмигэр кини совхозка ыанньыксытынан үлэлээбит. Кини сүөһү  иититин  1  кылаастаах  маастара,  коммунистическай   үлэ  ударнига.

1954  сыллаахтан  Мария  Никифоровна  салайар  «Улахан  күөл»  фермата  сыл  ахсын  былаанын  115-120  бырыһыан  толороро  уонна  социалистическай  куоталаһыыга  бастыҥнар  кэккэлэригэр  сылдара.  Кини хотугу  оройуон  ыанньыксыттарыттан  аан  бастакынан  биир  фуражнай  ынахтан  икки  тыһыынча  килограмм  үүтү  ыабыт. Ити  ситиһиилэрин  иһин  Мария  Никифоровна  Горохова  1969  сыллаахха  сүөһү  иитиитин  1  кылаастаах  маастарын  аатын  ылбыт.  1970 сыллаахха  Саха  АССР  Верховнай  Советын  Президиумун  Бочуотунай  грамотатынан  уонна  «Килбиэннээх  улэтин    иһин.  В. И.  Ленин төрөөбүтэ 100  сыла  туолуутугар»  юбилейнай  мэдээлинэн  наҕараадаламмыт.

Сэрии кэнниттэн Мария Никифоровна, биэс оҕо иһирэх ийэтэ буолан кэргэнинээн Герасимныын нэһилиэктэрин туһугар үгүс сыраларын ууран туран үлэлээбиттэр. Хос эһээм өр сылларга совхоз кадровай  булчутунан үлэлээбит.

Хос эбээм чахчы хоһуун  киһи. Кини 5 оҕону иитэн-үөрэтэн, атаҕар туруоран ону тэҥэ нэһилиэгин, оройуонун туһугар үлэлээбитэ, кыһаллыбыта ахсаана суох. Бириэмэтин сөптөөхтүк аттаран общественнай  үлэҕэ  активнайдык  кыттара.  1965 сыллаахтан  нэһилиэк  Советын  депутата,  профсоюз  месткомун  чилиэнэ,  1969  сыллаахтан  үлэһиттэр  депутаттарын  Верхоянскай  оройуоннааҕы  Советын  депутата буолбут.

Биһиги хос эбээбитинэн киэн туттабыт. А5а дойду сэриитин кэмигэр эбээлэрбит, эһээлэрбит олохторун, сэрии сут-кураан сылларыгар хайдах үлэлээн-хамсаан туораабыттарын,  кинилэр ааттарын-суолларын билэр, өйдүүр, үйэтитэр хас биирдибит эбээһинэспит буолар.

К.Слепцов, 8 “д” кл.,