Гоголева (Капитонова) Дария Спиридоновна (1919-1992 сс.)

 

Үлэ, тыыл бэтэрээнэ

Гоголева (Капитонова) Дария Спиридоновна – мин эһээм Капитонов Петр Спиридонович бииргэ төрөөбүт эдьиийэ. Кини Бүлүү улууһун Дьөккөн нэһилиэгин Инньээн өтөҕөр Мария Ефимовна Гоголева уонна Спиридон Елисеевич Капитонов дьиэ кэргэннэригэр 1919 сыллаахха бэс ыйын 20 күнүгэр төрөөбүтэ.

Холкуостар тэриллибиттэригэр Дария Спиридоновна 1938-39 сс. сайын Чай диэн сиргэ икки хостоох дьиэгэ 25 куойкалаах оҕо уһуйаанын тэрийбит. Бастаан тэрийэллэригэр малы-салы барытын бэйэлэрэ булан, утуйар ороннорун оҥорон, тэрийэн, таҥас тигэн, ынах иитэн, мас мастаан, кып-кыра аҕыйах ыйдаах оҕолору кытары уһуйааҥҥа көрбүттэр эбит. Онно биэс ньээнньэ, биир асчыт, биир сэбиэдиссэй үлэлээбиттэр.

Аҕа Дойду Улуу сэриитин кэмигэр Дария Спиридоновна Пушкин аатынан холкуоска улэлээбитэ. Сэрии ыар сылларыгар, эр дьон үксэ сэриигэ баран, холкуоска дьахталлар, оҕолор, кырдьаҕастар үлэлииллэрэ. От охсон, сүөһү көрөн, мас мастаан, балыктаан, таҥас-сап тигэн күүс-көмө буолаллара.

Ол курдук Пушкин аатынан холкуос 1941 сыл сайын 15234,8 ц оту оттуулларын оннугар 15523,02 ц оттоон былааннарын аһары толорбуттар. 60 ц оту уопсай мунньаҕынан оборона фронугар анаабыттар (“Колхоз суола” хаһыат, 1941 с. алтынньы 26 күнэ).

Холкуостаахтар 1941 сыл сэтинньитигэр Кыһыл Армияҕа 2 посылканы бэлэмнээбиттэр, 3 паара сылгы этэрбэһин, 1 ватнай бүрүүкэни, 3 бэргэһэни, 2 паара үтүлүк иһин, 1 баайыы ырбаахыны, 72 куобах тириитин (“Колхоз суола” хаһыат, 1941 с. сэтинньи 16 күнэ).

Пушкин аатынан холкуос сирдьит ыҥырыытын дьүүллэһиигэ 125 холкуостаахтара 7 сүөһүнү, 10 ц 12 кг бурдугу, 25,5 кг арыыны, 9 ц 50 кг собону, 255 кг үүтү, 5 кг оҕуруот аһын, 4230 солк облигацияны, 416 солк харчыны, 25 кг металлы, 100 үлэ күнүн, 212 шт куобах тириитин, 59 шт. араас ичигэс таҥаһы биэрэргэ эппиттэр. (“Колхоз суола” хаһыат, 1941 с. ахсынньы 11 күнэ).

Сэрии бүппүт сылыгар, 1945 сыллаахха, Дария Спиридоновна күҥҥэ 1 га оту охсон Саха АССР Наркомземын грамотатынан наҕараадаламмыт уонна “Бастыҥ от охсооччу” диэн аат иҥэриллибит. “Сарсыарда 5 чаастан саҕалаан киэһэ 11 чааска дылы от охсор этибит”, — диэн кэпсиир эбит. Ону туһулуур Свидетельствота баар.

Дария Спиридоновна кэргэнэ, Дмитрий Данилович Гоголев, Аҕа Дойду Улуу толоонуттан эргиллибэтэҕэ. Үс оҕолоро сэрии ыарахан, сут кэмнэригэр кыра саастарыгар утуу-субуу ыалдьан өлбүттэр. Гоголева (Капитонова) Дария Спиридоновна Аҕа Дойду Улуу сэриитин кэмигэр, сэрии бүппүтүн да кэннэ дойдутун туһугар килбиэннээх үлэтин кини мэтээллэрэ туоһулууллар.

 

 

 

 

Автор: М.Капитонова, ученица 6 “в” класса.