Гоголев Андрей Федорович (1933 г.р.)

Гоголев Андрей Федорович 1933 с. тохсунньу 20 күнүгэр Бүлүү оройуонун Дьөккөн нэһилиэгэр Эбэ диэн сиргэ төрөөбүтэ. Хампа орто оскуолатын 1955 с. бүтэрэн, комсомол путевкатынан колхозка үлэлээн баран 1960 с. Саха госуниверситетын историко-филологическай факультетын нуучча тылын отделениетыгар үөрэнэ киирбитэ. Хампа, Бороҕон оскуолаларыгар нуучча тылын учууталынан үлэлээбитэ.

Сэрии кэмигэр ийэтинээн ыанньыксыттаан үрдүк ыамы ситиһэллэрэ. 20-лии ынаҕы күҥҥэ түөртэ ыыллара. Кыһынын отторун-мастарын бэйэлэрэ дьаһаналлара. Итиннэ барытыгар Андрей Федорович илии-атах буолара. Ыһыы, хомуур, от үлэтигэр алталааҕыттан сылдьыспыта. Сэрии ыар кэмигэр улахан дьону кытта үлэтин иһин 1996 с. тыыл ветеранын аата иҥэриллибитэ.

Үрдүк үөрэхтээх, киэҥ билиилээх, общественнай үлэҕэ көхтөөх үлэһити 1969 сылтан Бороҕоннооҕу цеховой партийнай тэрилтэ секретарынан, лекторынан, политинформаторынан, партийнай үөрэххэ пропагандиһынан үлэлээбитэ. Бүтүн Союзтааҕы «Знание» общество чилиэнэ этэ.

1973 с. Лүксүгүн советын председателинэн быыбарданан үлэлээбитэ. Кини салалтатынан, бэйэтин кэмигэр аатырбыт кыыл иитээччилэрин таһаарбыт, саһыл фермата тутуллубута. 1977 сыллаахтан Бороҕон советын исполкомун секретарынан 1987 сыллаахха дылы үлэлээбитэ. «Орто Бүлүү» парткомун чилиэнинэн хас да сыл талыллыбыта.

1988-1991 сс. оскуолаҕа үлэлии сылдьан пенсияҕа барбыта. Бочуоттаах сынньалаҥар да үлэтэ суох олорботоҕо. 1991 сылтан 2002 сылга диэри сельсовекка бухгалтер-кассирынан үлэлээбитэ. 2002 сылтан хараҕынан доруобуйата мөлтөөн көрбөттөр обществоларын чилиэнэ буолбута. Ол да буоллар санаатын түһэрбэккэ радионан, телевизорынан аан дойду сонунун истэ-билсэ турара, чугас дьонугар, оҕолоругар, сиэннэригэр сүбэ-ама буолара.

Кини айылҕаттан сэмэй, чиэһинэй, дириҥ билиилээх киһи этэ. Салалтаҕа сылдьыбыт, үлэлээбит кэмнэрин Партия Саха АССР, оройуоннааҕы комитеттар Бочуоттаах грамоталара, Социалистическай үлэ кыайыылааҕын бэлиэлэрэ кэрэһэлииллэр.

 

 

Автор: Д.Д.Вердесия-Камальерис эһээтэ.