Мария Семеновна Герасимова (1928-2017)

Мария Семеновна Герасимова (1928-2017) — үлэ-тыыл бэтэрээнэ, 14 оҕону күн сирин көрдөрбүт Герой-Ийэ. 50 сыл тохтоло суох, үлэттэн илиитин араарбакка, ыанньыксытынан уонна ньирэй көрөөччүнэн уһулуччу таһаарыылаахтык үлэлээн Ленин, Октябрьскай Революция, Үлэ Кыһыл Знамята уордьаннарынан наҕараадаламмыта. Саха Өрөспүүбүлүкэтин норуотун хаһаайыстыбатын үтүөлээх үлэһитэ, Сунтаар улууһун бочуоттаах олохтооҕо.Мария Семеновна Ийэ буолуу I, II степеннээх мэтээллэринэн, Ийэҕэ Албан Аат I, II, III степеннээх уордьаннарынан, Герой-Ийэ, Саха Өрөспүүбүлүкэтин Ил Дарханын Ийэҕэ Үрдүкү Махтал бэлиэлэринэн наҕараадаламмыта.

Мария Семеновна таһаарыылаах үлэнэн эрэ муҥурдаммакка, общественнай-политическай деятель быһыытынан элбэх өрүттээх, киэҥ далааһыннаах үлэни ыыппыта. Кини Бордоҥ нэһилиэгэр хаста даҕаны сэбиэт депутатынан талыллыбыта, райком уонна партком чилиэннэринэн үлэлээбитэ. 7- с ыҥырыылаах Саха АССР Верховнай Сэбиэтин депутатынан, ССКП обкомун пленумун чилиэнинэн, Саха Сирин дьахталларын съезтэрин делегатынан талыллан, тыл этэн, санаа үллэстэн, баай уопутун ыччакка тарҕатан, Саха Сирин уонна Сунтаар оройуонун үлэһиттэрин олохторо тупсарыгар, экономическай уонна социальнай турук сайдарыгар күүһүн-күдэҕин уурбута.

Үтүө олох үтүө холобурдаах, үгэстэрдээх. Мария Семеновна, Петр Данилович үгүс оҕолоро эмиэ бэйэлэрин курдук элбэх оҕолоохтор, ол аата элбэх сиэннээхтэр, элбэх хос-хос сиэннээхтэр. Кинилэр холобурдара, элбэх оҕолоох дьиэ-кэргэн буолуулара бу саҥа балысхан сайдыы үйэтигэр, биһиги норуоппут кимин-ханныгын көрдөрөрүгэр быһаарар суолталаах буолла.

 

Автор: А. Арсиэн, ученик 8 а класса