Гаврильев Виссарион Акимович (1932 г.р.)

Мин, Гаврильев Виссарион Акимович кулун тутар 23 күнүгэр 1932 сыллаахха төрүөбүтүм,олохтоох иккис Хаҥаласпын. 1940 сыллаахха Бүтэйдээххэ1кылааска үөрэнэ киирбитим.Кылааспытыгар 21оҕо этибит.1941сыллаахха сиилэстээһиҥҥэ киирээри сырыттахпытына сельсовет бэрэссэдээтэлэ Васильев Алексей Михайлович маҥан атынан Маартан Хомустааҕынан кэлэн иһэрин көрсөн аанын аһан биэрбиппит. Онно кини «Тоҕойдоруом, дьиэҕитигэр барыҥ, сэрии буолбут» -диэбитэ. Кинини батыһан барбыппыт хонтуораҕа киһи бөҕө мустубут этэ. Бары кэри-куру буолбуттар. Онно барытыгар биһиги оҕо санаабытыгар Ваильев А.М. буруйдаах курдук санаабыппытын билигин да умнубаппын. Дьэ итинник саҕаламмыта биһиги оонньуур сэриибититтэн атын дьиҥнээх сэрии. Итинтэн ыла хас сарсыарда аайы оскуолаҕа «линейка» буолара, онно сэрии туһунан иһитиннэрии буолара, үөрэххэ ирдэбил кытаанах буолта. 1942 сыллаахха пионерга киирбитим уонна сельсовет председателя Васильев Алексей Михайлович -Бэтинскэй мэктиэтинэн ахсынньы бүтүүтэ колхоз чилиэнинэн ылыллан үөрэнэ-үөрэнэ хотон харабылларын көрөөччү, хонтуруолунай таабыллааччы буолбутум. Көлөһүн күнэ тохсунньу 1 күнүттэн 1943сыллаахха ааҕыллан барбыта. Ол иннинэ да сайын холхуоска окко оҕус сиэтэртм, бурдук ылҕатар звеновод этим. Саас ыһыыга бурдук сиэмэтин харыбынайа буоларым. Биһиги колхозпут Стахановтыын холбоһуон иннинэ Бүтэйдээх диэн этэ. Бөһүөлэк аайы оҕус тардар миэлиҥсэ баара. Онно эмиэ оҕолор үлэлиирбит. 1942сылтан байыаннай нолуок киирбитэ. Онон, ынах ахсыттан 16кг, эт, 8кг арыы, харчынан оһох иһин төлөбүр баар буолбуттара. Ол иһин кыстык хаара түстэ да колхозтар чулуу дьонноро бэдэрээт көтөҕүүтэ диэн колхоз уонна биирдэм ыаллартан эт,арыы хомуйан атыылыы Алдаҥҥа хомуналлара. Онтон харчылана нолуоктарын төлүүллэрэ, ас-таҥас атыылаһаллара. Күһүн баран баран саас кэлэллэрэ, биһиги оҕолор күүтүү бөҕө буоларбыт. 1942 сыл бэс ыйыгар аҕам сэриигэ ыҥырыллан барбыта. Биһиги моҕотойдоон, бурҕаалаан, чыс кутуйахтаан лаапыга туттаран ас, табаах ылынарбыт, ыаллар хортуоска, бурдук, эриэппэ, түрүнүөпүс ыһан сиирбит.

1955-1956сылларга олохтоох Түмүк нэһилиэгэр депутатынан талыллан сельсовет секретарынан, солбуйааччы председателинэн үлэлии-үлэлии оскуолаҕа производственнай баһаатай буолан икки сыл 13 оҕону кукуруза үүннэрэр звеноҕа үлэлэтэн 1956 сылга Ньурбаҕа буолбут тыа хаһаайыстыбатын бастакы слетугар кыттан райкомол, обкомол грамоталарынан, кыра да буоллар бириэмийэлэнэн турабыт. Колхозка оҕуруот биригэдьиирин тэҥэ колхоз комсомолун секретара буолан икки сыл райкомол чилиэнинэн сылдьыбытым.

1955 сыл түмүгүнэн биһиги нэһилиэк оҕо төрөөһүнүгэр республика таһымыгар бастыҥ буолбуппут. 1955 сылга 15 ыал холбоһон, 62 оҕо төрөөн үөрүү-көтүү бөҕө буолбуппут.
Ол саҕана Михайлов Николай Васильевичтыын ити билигин тутуллан турар спортплощадканы былааннаабыппытын үөһээҥҥилэр аахайбатахтара. Ол баҕабыт туолан билигин үлэлии сылдьар оҕолорбутугар махталым улахан.

Кэргэним Гаврильева Антонина Егоровна быйыл 2009 сыл кулун тутар бастакы күнүгэр 60 сааһын уонна ыал буолбуппут 40сыла, олохтоох почтаҕа тохтоло суох үлэлээбитэ 39 сыла быйыл туолар. Аҕыс оҕо ийэтэ-аҕата, уон сиэн, икки хос сиэн эһээлээх эбэтэ буолан нэһилиэкпит 110 сылын үөр-көтө, кыра да буоллар ситиһиилээх көрсөбүт. Мин быйыл тыыл, ВТЭС бэтэрээнэ,суруйааччы аатын ылан, Саха итэҕэлин 20-чэ сыл тарҕатыһан тиийэн кэллим.

Бэчээккэ бэлэмнээтэ Егорова Валентина Васильевна – Ньурба улууһун, Маар нэһилиэгин “Алгыс” добровольческай түмсүү салайааччыта,

Автор: А.Павлова, 8 а кылаас үөрэнээччитэ