Габышев Николай Николаевич                          (18.03.1933-12.12.1997сс.)

Мин эһэм Габышев Николай Николаевич- Татаар 18.03.1933-12.12.1997сс олорон ааспыта. Уус-Алдан улууһун Бороҕон нэһилиэгэр төрөөбүтэ, онно олорбута.

Киниэхэ модьу-таҕа көрүҥнээх, кэтит дараҕар сарыннаах, хотойдуу хонтоҕор муруннаах уол оҕону төрөппүттэрэ абааһыны буккуйан «Татаар» диэн таптал ааты иҥэрбиттэрэ.

Аатын батан күүстээх-уохтаах, быыппастар былчыҥнардаах, кэтит сарыннаах, сытыары-сымнаҕас майгылаах, куруук дьону бэйэтин тылыгар киллэрэн, аймахтарын түмэ тардар талааннаах, күүстээх энергиялаах киһи этэ. Эһэм кыра эрдэҕинэ сэттэ көстөөх сиртэн сатыы сылдьан оскуолаҕа үөрэммитэ. Кини биир быһыы өйүө килиэбин интернакка олорор убайынаан аҥардаһан сииллэрэ, аас-туор, сут кэминээҕи аччыктааһыны эттэринэ-хааннарынан билбиттэрэ.

Эһэм 6 саастааҕыттан колхозка оҕус сиэтээччинэн үлэтин саҕалаабыта. Кини 15 саастааҕар улахан дьону кытта тэҥҥэ үлэлээн «Үлэҕэ килбиэнин иһин» мэтээлинэн наҕараадаламмыта. Эһэм сэрии ыар сылларыгар сылайары аахсыбакка, сынньананы билбэккэ, » сэрии фронугар көмө буоллун» диэн убайынаан куобахтан, моҕотойдоон, тииҥнээн тирии туттараллара. Мин санаабар, онон кинилэр Улуу Кыайыыга эмиэ бэйэлэрин сэмэй кылааттарын киллэрбиттэрэ. Ол да иһин төһө да саастара сиппэтин, оҕолорун иһин » Тыыл ветерана» буолбуттара. Эһэм оонньооботох оҕо саастаах сэрии кэмин оҕото да буоллар, Арыы Тииккэ Кыһыл Кырдал оскуолатын 4 кылааһын үөрэнэн бүтэрбитэ. Кини кинигэни, хаһыаты, телевизоры ааҕар-көрөр буолан, дойду сонунун бука барытын олус интириэһиргиирэ, политиканы ырытарын сөбүлүүрэ. Эдэр сылдьан хайыһардыыра, хаҥкылыыра, курдаһан тустара. Билигин умнуллан эрэр саха дьиҥ былыргы тустуутунан үлүһүйбүт эбит. Кырдьаҕастар кэпсииллэринэн, утарылаһааччыларын курданалларыттан көтөҕөн ылан, бэйэтин төбөтүн үрдүнэн быраҕара үһү. Оннук гынан ыһыахтарга дьон сөҕүүтүн-махтайыытын элбэхтэ ылбыта. Кэлин нэлиһиэк бырааһынньыктарыгар, ыһыахтарга мас тардыһыытыгар тэҥнээҕин булбакка өрүү кыайара, харчынан, мүһэнэн наҕараадаланара. Ийэм кэпсииринэн биир ыһыахха үс мүһэни ылан дьиэ кэргэнин улаханнык үөрдүбүт. Эһэм Николай Николаевич өр кэмнэргэ Тумул отделениятыгар тракториһынан, сайынын окко биригээдэҕэ үлэлээбитэ.

Эһэм иллэҥ кэмигэр айылҕалыын алтыһарын, тыаҕа сылдьан күүс- күдэх ыларын билэр буолан, куска, куобахха куруук сылдьара. Байанайа да кинини үгүстүк маанылыыра. Сайынын илим үтэн көмүс хатырыктааҕы өлгөмнүк балыктаан, аймахтарыгар, ыкса ыалыгар үөрэ-көтө бэрсэрэ. Күһүнүн нэһилиэк муҥхата кинитэ суох тэриллибитэ, эһэм муҥхаҕа биригэдьииринэн, тонна үктээччинэн сылдьара. Сааһын куйуурдуура, саха киһитин сиэрин-туомун тутуһан сиэрдээхтик бултка сылдьарын сөбүлүүрэ. Ийэтинээн Мария Яковлевналыын Булуҥҥа баран бултаан-алтаан, балыктаан кэлэллэрэ. Абаҕатын кыыһыгар Чокурдаахха баран хаастыы сылдьыбыта, Абый улууһугар эмиэ бултка баран кэлбитэ.

1970с совхоһугар үчүгэй үлэтин иһин Чернай муораҕа баран сынньанан кэлэр путевканан наҕараадаламмыта, Грузияҕа Сухуми куоракка санаторийга баран сынньаммыта.
Ийэм ахтарынан эһэм сытыары сымнаҕас майгылаах, амарах, аһыныгас сүрэхтээх, киэҥ көҕүстээх киһи этэ. Ол да иһин оҕолорун биирдэ да мөхпөккө, куолаһын соноппокко улаатыннардаҕа. Мин эһэбинэн киэҥ туттабын, кини сырдык аатын үрдүктүк сыаналыырын.

 

Автор: С.Винокурова 5 д кылаас үөрэнээччитэ.