Филиппова Татьяна Владимировна (1925 г.р.)

 

Эбээм Филиппова Татьяна Владимировна 1925 сыл кулун тутар ый 25 күнүгэр Хаҥалас улууһугар Нөмүгү нэһилиэгэр төрөөбүт. Ийэлэрэ Татьяна Васильевна 1936 сыл ыараханнык ыалдьан эдэр сааһыгар суох буолбут, аҕалара Филиппов Владимир Петрович колхуоска биригэдьииринэн, бэрэсэдээтэлинэн уһуннук үлэлээбит, атах оонньуутугар кэпсэлгэ сылдьыбыт спрортсмен эбит. Сэрии кэмигэр 1942 сыллаахха аҕалара өлөн эдьийин Натальяны уонна балтын Еленаны  кытта  тулаайах хаалбыттар. 1940 -1943 сылларга колхуоска хонуу араас үлэтигэр үлэлээбит. Ханна баҕар буоларын курдук сэрии ыарахан дьыла, сут-кураан алдьархайа дьахталлар, оҕолор үрдүлэринэн барбыта. Сэриигэ барбыт, үлэни кыайар, доруобай дьоннорун солбуйан, сүрүн астара бэс сутукатынан үссэнэн, иэдьэгэй аһылыктанан колхуос туох баар ыарахан үлэтин толороллор эбит. «Бары күүһү фроҥҥа, Кыайыы туһугар!»  диэн ыҥырыыга эппиэттээн, колхуос былааннаах сорудахтарын толорон түүннэри-күннэри өлөрдүү мөхсөр этибит диэн ахтара эбэбит. Атын сирдэртэн холуйдахха сэрии кэмигэр биһиги нэһилиэккэ биир да киһи хоргуйан өлбөтөҕө диэн кэпсиирэ.

1943 сыл кулун тутар ыйга Дьокуускай куоракка киирэн Аҕа дойдуну көмүскүүр Улуу сэрии бүтүөр диэри Горотоп диэн тэрилтэҕэ куонньук (ат көрер) дуоһунаһыгар үлэлээбит. Бу сылларга медицинскэй сиэстирэ үөрэҕэр үөрэммит уонна 1947 сылтан Чурапчытааҕы балыыһаҕа, Таатта улууһун Ытык-Күөл, Харбалаах, Чычымах балыыһаларыгар мед сестранан пенсияҕа тахсыар диэри 25 сыл үлэлээбит. Эбээм кыратык да илиитэ иллэҥ буоларын сөбүлээбэт этэ. Иистэнэрэ, быысыбайдыыра,  эмтээх оттору үргээн эмп оҥорор этэ.

Эбээлээх эһээм 1950 сыллаахха ыал буолан  6 оҕону төрөтөн дьоллоохтук олорбуттара, 15 сиэннээхтэр, 18 хос сиэннээхтэр, 4 хос хос сиэннээхтэр.  Биһиги кинилэринэн киэҥ туттабыт, этэн хаалларбыт кэс тылларын толорон, олоҕу таптаан, ситиһиилээхтик үлэлээн, чөл олоҕу тутуһан кинилэр олохторун салҕыыбыт.

Петр Гаврильевич Колотинскай наҕараадалара: В.И. Ленин төрөөбүтэ 100 сылынан «Үлэҕэ килбиэнин иһин», «Үлэҕэ туйгунун иһин», «Аҕа дойду сэриитин 1941-1945 сс килбиэннээх үлэтин иһин» мэтээллэрдээх, «Үлэ ветерана», «Тыыл ветерана» бэлиэлэрдээх.

Татьяна Владимировна Филиппова наҕараадалара:  «Аҕа дойду сэриитин 1941-1945 сс килбиэннээх үлэтин иһин», «Г.К. Жуков» мэтээллэрдээх, «1,2 истиэпэннээх Ийэ мэтээллэрэ», «Үлэ ветерана»,   «Тыыл ветерана» бэлиэлэрдээх.

 

 

 

Автор: А.М. Афанасьева, внучка