Филиппова (Алексеева) Пелагея Ивановна (1932- 1997с.с.)

Мин эбээм Филиппова Пелагея Ивановна «Омолдоон» нэһилиэгэр 1932 сыллаахха, тохсунньу 14 күнүгэр төрөөбүтэ.

Аҕата Алексеев Иван Михайлович 1941 сыллаахха Аҕа Дойду сэриитигэр ыҥырыллан барбыта, сэрии кэмигэр сураҕа суох сүппүтэ. Онтон ийэтэ Алексеева Анна сотору кэминэн ыалдьан өлбүтүн кэннэ, оҕолор бэйэлэрэ эрэ тулаайах хаалбыттара. Ол да буоллар ыарахан, аччык кэмнэри аһардан, быраатыгар ийэ буолан, Пелагея Ивановна дьулуурдаахтык үлэлээн- хамсаан, киһи- хара буоларга үлэ дьүккүөнүгэр түспүтэ. Начальнай оскуоланы бүтэрээт балыыһаҕа үлэлээбитэ. Совхозка биригэдьииринэн, Сүлэ нэһилиэгэр 9 сыл комсомол секретарынан, оройуон Народнай хонтуруолун бэрэссэдээтэлинэн дьаныардаах, тахсыылаах үлэтин көрдөрбүтэ. Ол кэмнэргэ, кыра быраатын үөрэттэрэн, геолог үрдүк үөрэҕин бүтэртэрэн, Алексеев Сергей Иванович Айхалга, Удачнайга үлэһит буолан Саха Сирин бастакы главнай инженера, Государственнай премия лауреата, элбэх орденнар кавалера буолбута.

Пелагея Ивановна хаста да депутатынан талыллан, дьон эрэбилин, итэҕэлин толорбута.

Партийнай тэрилтэ секретарынан, Райком, Обком чилиэнинэн талыллан үлэлээбитэ. Элбэх улуус, правительство мэдээлинэн, бочуотунай грамотатынан наҕараадаламмыта.

9 оҕо амарах ийэтин, Ньурба улууһун бочуоттаах гражданинын, Тыыл, Үлэ бэтэрээнин, тапталлаах эбээбитин өйдүү- саныы сылдьабыт, чугас дьонугар, сиэннэригэр, оҕолоругар сүрэхпитигэр мэлдьитин баар.

 

 

Автор: А.Петрова