Филиппова Акулина Алексеевна (1926 г.р.)

Филиппова Акулина Алексеевна 1926 года рождения — ветеран тыла и труда, мать героиня. Награждена орденом Материнская Слава III степени.

Эбээбит Кононова Акулина Алексеевна Кировскай Харыйалааҕар 1923 сыллаахха төрөөбүтэ. Кини аҕата Кононов Василий Иннокентьевич (Бөчөөх Баһылай) төрүт Кировскай нэһилиэгин олохтооҕо, ийэтэ Павлова Феодосия Николаевна Кэбээйи Чагдатыттан төрүттээх эбит. Кинилэр 10 оҕоломмуттар. А5ата кинини оҕото суох быраатыгар Кононов Алексей Иннокентьевичка (Дьобох Өлөксөйгө) ииттэрэ биэрбит. Даҕай оскуолатыгар үөрэнэн 4 кылаас үөрэхтээх этэ. Кыраһыабай буочардааҕын иһин учуутала Федоров Петр Михайлович оскуола истиэнэтин хаһыатын киниэхэ суруйтарар эбит. Эбээбит наһаа үчүгэйдик иистэнэр, минньигэс астаах хаһаайка этэ, элбэх саҥата-иҥэтэ суох, наар үлэлээн түбүгүрэ сылдьар мап-маҥан, нап-нарын, хатыҥыр курбуу курдук уһун кыраһыабай дьахтар этэ. Эбээлээх эһээ олох кырдьыахтарыгар диэри сүөһү ииттэн олорбуттара, сайын аайы сүөһүлэригэр бэйэлэрэ отторун оттоноллор этэ.

Эһээбитин Филиппов Иван Яковлевиһы көрсөн 1942 сыллаахха ыал буолбуттар. Хаахынайдаах эбэ барахсан быйаҥнаах сиригэр сүөһү ииттинэн, күөлүттэн куһу-хааһы, өрүс балыгын, собону, тыаттан туһахтаан куобаҕы, тииҥи бултаан аһынан тутайбакка бу дойдуга 5 оҕону төрөтөн 16 сыл олус дьоллоохтук олорбуттара. Хаахынайдаахха начаалынай оскуола, балыыһа, кулууп, библиотека баара. Оҕолор арыый улаатан, начаалынай оскуоланы бүтэрэн 1957 сыллаахха 2 оҕуһунан 5 оҕону илдьэ Бэрдьигэстээххэ көһөн кэлэллэр. Бэрдьигэстээххэ промартыал маҕаһыыныгар эһээбит продавецтыы сырыттаҕына Мытаахтан колхоз председателэ М.С.Данилов киирэ сылдьан дойдугар тахсан сылгыһыттыаҥ дуо диэбитин ылынан аны Мытаахха көһөллөр, бэйэтэ колхозка сылгыһытынан, кэргэнэ оскуолаҕа остуораһынан үлэлээбиттэрэ. Кэнники 2 сыл кольцевиктаабыта. 1960 сыллаахха саас игирэ кыргыттар Доралаах Вера төрөөбүттэрин кэннэ Бэрдьигэстээххэ көһөн кэлэллэр. Ол сыл күһүнүгэр Акулина Алексеевна сабыс саҥа тутуллубут этээстээх оскуолаҕа остуораһынан, онтон Иван Яковлевич бу оскуолаҕа кочегарынан үлэҕэ киирэллэр. Кэнники завхоһунан үлэлээбитэ. Иккиэн ити оскуолаҕа пенсияҕа тахсыахтарыгар диэри үтүө суобастаахтык, ханна да халбарыйбакка үлэлээбиттэрэ. Пенсияҕа тахсан баран эһээбит ДУ-га кочегардыы киирбитэ, бу тэрилтэҕэ үлэлии сылдьан коммунистическай үлэ ударнига аатын ылбыта уонна 72 сааһыгар уурайбыта. Эбээбит оскуолаттан пенсияҕа тахсан баран дьиэтин аттыгар турар 1 нүөмэрдээх оҕо уһуйааныгар тас остуораһынан сааһырыар диэри үлэлээбитэ.
Акулина Алексеевна уонна Иван Яковлевич 8 оҕону төрөтөн, үөрэттэрэн олох суолугар үктэннэрбиттэрэ, элбэх сиэн оҕону бүөбэйдэспиттэрэ. 62 сыл бииргэ олорон эһээбит 96 сааһыгар 2004 сыллаахха, эбээбит 85 сааһыгар 2008 сыллаахха орто дойду олоҕуттан арахсыбыттара. 8 оҕо, 15 сиэн, хос-хос сиэннэр кинилэртэн силис тардан олохторун салгыыллар.

Эбээлээх эһээ биһиэхэ үтүө холобур буолаллар, күндү дьоммутун олуһун таптыыбыт, ахтабыт, киэн туттабыт

 

 

Авторы: Хос сиэн С.Михайлова 1б кылаас үөрэнээччитэ
(уола Е.И.Филиппов ахтыытынан сиэнэ С.В.Михайлова хомуйан оҥордо)