Василий Григорьевич Федотов (1910-1990 сс.)

Сэрии, тыыл, үлэ ветерана Василий Григорьевич Федотов уонна кэргэнэ — тыыл, үлэ ветерана Февронья Гаврильевна 59 сыл устата Чурапчы оройуонун Одьулуун нэһилиэгэр ыал буолан олорбуттара. Элбэх оҕону төрөтөн, 5 оҕону улаатыннаран, ыал оҥортоон билигин кинилэр олохторун кэнчээри ыччаттара салҕыыллар.

Василий Григорьевич 1910 сыллаахха Боотуруускай улуус уруккута Бабаҕа Сулҕаччытыгар «Бүөр» алааска төрөөбүт. Ийэтэ Өлөөнө Ньукулаайабына, аҕата Киргиэлэй Сөдүөтэбис (Өттүк, 1867с.т.) үлэһит дьон буолан 20-чэ сүөһүлээх, атыыр үөрдээх ыал, сиир бурдуктарыгар ньэчимиэни бэйэлэрэ ыһаллар эбит. 1895 с. биэрэпискэ Григорий Дмитриев (Өттүк оччотооҕу араспаанньата) уонна Еримей Абрамов 9 дууһалаах 2 ыал Өлөҥнөөххө олорбуттар. Федотовтар 9 оҕолоруттан Баһылай 8-с оҕо эбит.  Федотов В.Г. (Кустуур) 1931 сыллаахха «Иһэр кэккэ» (кэлин «Тэбэнэт эккээйитэ») ТСОЗ-ка чилиэнинэн киирбит.

Хос эһээбит Василий Григорьевич 1943 сыл сайыныгар Кэбээйиттэн Японияны утары сэриигэ ыҥырыллыбыт. Чита уобалаһыгар Забайкальскай байыаннай уокурук 673 стрелковай полка 3-с батальонун 10-с ротатыгар рядовойунан сулууспалаабыт. Тифкэ ыалдьан, госпиталь кэнниттэн 1944 с. НКО войсковой чаастарыгар байыаннай ыскылааттары харабыллаабыт.

1946 с. сайыныгар төннөн кэлэн колхозка үлэлиир. 1947-1949 сылларга хонуу биригэдьииринэн ананар. 1950 сылга Орджоникидзе аат. уонна «Трактор» колхозтар холбоһон Карл Маркс аата иңэриллэр. 1950-57 сс. колхоз араас үлэтигэр сылдьыбыт, сорох кыһын булчут буолара.

Василий Григорьевич 1974 сылга Карл Маркс аатынан совхоз тэриллиитигэр рабочайынан киирбитэ. 1975 сылга 36 сыл стажтаах 65 сааһыгар үлэлээн бүппүтэ.

Аҕа Дойду сэриитин 2-с степеннээх орденынан, «Японияны кыайыы иһин», Улуу Кыайыы 20,30,40 сылларын, Сэбилэниилээх күүстэр 50,60,70 сылларын юбилейнай мэтээллэринэн наҕараадаламмыта. Сэрии ветераннарын туһунан республика «Память» кинигэтин төрдүс томугар 264 стр. кини туһунан суруллубута.