Федорова Анна Спиридоновна (1929 г.р.)

Мин, Федорова Анна Спиридоновна, 1929 сыллаахха саас Горнай оройуонугар Маай учаастагар, урукку Мытаах нэһилиэгэр күн сирин көрбүтүм.Икки сааспар ийэм Евдокия Гаврильевна Федорова ыалдьан күн сириттэн күрэммитэ, аҕам Спиридон Васильевич Исаков аҕыс сааспар өлбүтэ. Аҕам өлбүтүн кэннэ таайым Федоров Михаил Гаврильевич иитэ ылан баран, сэриигэ өлбүтэ. Онон эбэлээх эһээбэр иитиллибитим.

Эбэлээх эһээм кырдьаҕас буоланнар, үөрэттэрэр кыахтара суоҕа, онон үөрэхтэн маппытым. Кыра эрдэхпиттэн холкуоска үлэлээбитим. Сайын от үлэтэ, саас бурдук ыһыыта, кыһын от-мас тиэйиитэ. Саһаан үлэтигэр үлэлиир этибит. Оройуҥҥа саһаан эрбиирбит, атынан, оҕуһунан тиэйэн тэрилтэлэргэ аҕаларбыт. Арыый улаатан баран, субай сүөһү көрүүтүгэр, дайаарканан үлэлээбитим.

Кыайыы буолар күнүгэр 8 биэрэстэлээх учаастактан Бэрдьигэстээххэ илимиит бурдук тиэйэ биригэдьиирбинээн кэлбиппит парад, үөрүү-көтүү бөҕө буола турар этэ. Кыайыы кэнниттэн 1950 сыллаахха диэри холкуоска үлэлээбитим. Сэрии сылларыгар үчүгэй үлэм иһин 1947 сыллаахха “За доблестный труд в Великой Отечественной войне 1941-1945 гг.” мэтээлинэн наҕараадаламмытым.

1950 сыллааахха Маҕаны киһитигэр Григорьев Николай Алексеевичка кэргэн тахсан, онно көспүппүт. Маҕаныга эмиэ холкуоска үлэлээбитим.Кэргэним Николай Алексеевич куоракка тракторист идэтигэр үөрэнэн тракторист буолан, оройуон киинигэр Бэрдьигэстээххэ көһөн кэлбиппит. Манна кыра оҕолордоох буолан детсадка ньээҥкэнэн үлэлээбитим, оһох оттор этибит. Онтон оскуолаҕа дьиэ хомуйааччынан пенсияҕа тахсыахпар диэри үлэлээбитим. Кыра сааспыттан ыарахан үлэҕэ үлэлээн, эрдэ харахпын көрдөрбөккө, харахпынан бастакы группалаах инбэлиит буолбутум.
1961 сыллаахха халтарыйан охтон илиибин тоһуппутум, ону хирург быраас сыыһа тутан, уҥа илиибиттэн маппытым.

Элбэх сыллаах эҥкилэ суох үлэм иһин араас таһымнаах салалталартан наҕараадалары туппутум. Мэтээллэрим: сэрии ыар сылларыгар үлэм иһин 1947 сыллаахха дойдубут салайааччыта, генералиссимус И.В.Сталин “За доблестный труд“ диэн мэтээлинэн наҕараадаламмытым., ону таһынан Сэбиэскэй Сойуус маршала Г.К.Жуков мэтээлэ, Улуу Кыайыы 50-с, 60-с, 65-с уонна 70-с сылларынан үбүлүөйдээх мэтээллэр бааллар. 1972 сыллаахха “Мать-героиня” уордьан ылбытым. Ону таһынан араас бэлиэлэр бааллар. Ол курдук, “Саха сирин бочуоттаах кырдьаҕаһа”, “За вклад в развитие Горного улуса”, “Ийэҕэ махтал”, “Бэрдьигэстээх нэһилиэгин бочуоттаах гражданина” 2019 с.

2004 сылтан ”Аҕа дойду сэриитин бэтэрээнэ” ааты сүгэбин. 10 оҕом, 28 сиэним, 31 хос сиэним, 4 хос-хос сиэним хойут өйдүү-саныы сылдьыахтара диэммин билиһиннэрдим.

Автор: А.Кардашевская, хос эбэтин Анна Спиридоновна Федорова ахтыытыттан суруйуута.