Федоров Федор Константинович (1884-1982 гг.)

 

Хос эһээм, Федоров Федор Константинович, 1884 сыллаахха Торбуох нэһилиэгэр, Хочо (Сунтаар)  улууһугар,  Накыыт диэн алааска төрөөбүт. Аҕата, Константин Федоров, ийэтэ Марфа Федорова ынах, сылгы ииттэн, бурдук ыһан айахтарын ииттэн олорбуттар. Дьоно 17 оҕоломмуттарыттан иккиэ буолан хаалбыттар. Ол иһин хос эһээбин Бөтөс диэн ааттаабыттар, абааһы сиэбэтин диэн. Быраата Уйбаан 17 сааһыгар, корь ыарыытыгар ыалдьан өлбут.

Хос эһээбин 4-5 саатааҕар Тойбохой таҥаратын дьиэтигэр киллэрэн, аҕабыкка сурэхтэтэн, Федор диэн ааты биэрбиттэр. Улаатан, ыал буолар сааһа кэлбитигэр хос эбээбин Прасковья Амбросьеваны кытта холбообуттар. Хаста да оҕоломмуттарыттан икки кыыс оҕо хаалбыт. Эбээм Маайа, уонна балта Ксения.

1939 сыллаахха «Кыһыл Маай» колхоз тэриллибитигэр, 20-чэ ыал киирэн, баайдарын холбообуттар. Хос эһээбит 11 үөрдээх сылгыны,10 төбө сүөһүнү биэрбит.

Федор Константинович колхоз тэриллиэҕиттэн сылгыһытынан улэлээбит. Сэрии кэмигэр эр дьон сэриигэ барбыттарын кэннэ, атынан от оҕустаран, от кэбиһиитин кэмигэр от кыдамалааан уонна араас үлэҕэ сылдьыбыт. Күһүнүн сылгытын көрөр-истэр эбит, быыһыгар бултаан государствоҕа сымнаҕас көмүһү туттарбыт.

 

Ыар сэрии, аччык дьыллар буолбуттарыгар, хос эһээм атынан Өлүөхүмэттэн, Мухтуйаттан бурдук таһааран ыкса ыалларын хааччыйара. Эр дьон суох ыалларыгар, үлэтин кэннэ бултаабытын түнэтэн, элбэх киһини хоргуйан өлөртөн быыһаабыт.

Сэрии кэнниттэн колхоз товарын тиэйэн Өлүөхумэҕэ, Мухтуйаҕа киирэн атыылаан тахсара. Сонуордаан бөрөлүүрэ, тириитин маҕаһыыҥҥа туттарара. Биир улахан тириини Тойбохой музейыгар биэрбитэ. Биирдэ 4 оҕолоох бөрө хороонун булан «тыыннаах муннукка» биэрбит. Кэнники хос эһээбин бөрө батыһа сылдьан улуйар дииллэрэ.

Колхозтар бөдөҥсүйбүттэрэ: онно барытыгар хос эһээм пенсияҕа  тахсыар диэри сылгыһытынан үтүө суобастаахтык үлэлээбитин кини үгүс наҕараадалара туоһулууллар. «Ленин» колхоз Бочуотун Кинигэтигэр киллэриллибитэ.

 

 

 

Автор: В.В.Васильев