Тыыл уонна үлэ бэтэрээнэ.

Федоров Андрей Яковлевич (1933-2023 гг.)

Мин хос эһэм Федоров Андрей Яковлевич 1933 сыл муус устар 20 күнүгэр, Бүлүү улууһун 1 Күүлэт нэһилиэгэр Федоров Яков Федорович уонна Петрова Мария Ивановна дьиэ кэргэнигэр күн сирин көрбүтэ. Сэрии кэмигэр эһэм уонча саастаах оҕо. Ол бириэмэҕэ хоргуйуу, тоҥуу-хатыы кыһалҕатын этинэн-хаанынан билэн, кыра эрдэҕиттэн айылҕаҕа сылдьан, ыарахан үлэҕэ эриллэн улааппыт. Бииргэ төрөөбүттэр аҕыстар, онтон түөрт оҕо сут дьылга сэрии кэмигэр суох буолбуттар.

1954-1958 сылларга Амакинскай алмаас экспедициятыгар сирдьитинэн сылдьыбыт. 1961 сылга кыылы иитэр «Мастаах» совхоз отделениятыгар оробуочайынан киирбит. Ону тэҥэ 10 сыл табаһытынан үлэлээбит. 1972 сылтан сайынын от үлэтигэр биригээдэни салайбыт, 14 сыл ыччаты үлэҕэ уһуйбут, үөрэппит. Ол кэннэ тутуу үлэтин сүрүн наставнигынан сылдьыбыт.

Кадровай булчутунан үлэлээн элбэх күндү түүлээҕи туттарбыта. 1984, 1987, 1989 сылларга Саха АССР 3 төгүллээх уонна Бүлүү оройуонун 7 төгүллээх чемпион булчута диэн үрдүк ааттары ылбыта.

Эһэм Андрей Яковлевич килбиэннээх үлэтин туоһулуур элбэх “Почетнай грамоталардаах”, “Ударник коммунистического труда” диэн кинигэлэрдээх, “Чемпион” диэн кыһыл лиэнтэлэрдээх. 1989 сылга Бүлүү улууһун «Бочуот» дуоскатыгар киллэриллибитэ. Бүлүү куоратын уонна 1 Күүлэт нэһилиэгин “Бочуоттаах олохтоо5о” аат иҥэриллибитэ. Бэйэтин кэмигэр муҥханан балыктаан нэһилиэнньэтин балыгынан хааччыйбыт киһи быһыытынан сыаналанар.

Мин хос эһэм Федоров Андрей Яковлевич – 8 оҕо тапталлаах аҕата, элбэх сиэннэр, хос сиэннэр эйэҕэс эһэлэрэ. Биһиги хос эһэбитинэн киэн туттабыт, хаһан да умнуохпут суоҕа.

 

Автор: Х.Полятинский, ученик 4 класса.