Эверстов Дмитрий Алексеевич

Мин хос эһэм, хос эбэм — киэн туттар дьонум!

Хос эһэм Эверстов Дмитрий Алексеевич 1907 сыллаахха балаҕан ыйын 27 күнүгэр төрөөбүтэ.

Хос эбэм, Кириллина Мотрена Семеновна 1920 сыллаахха тохсунньу 20 күнүгэр күн сирин көрбүтэ.

Эһэлээх эбэм 1941 сыллаахха ыал буолан 3 кыыс, 7 уол оҕолонон нэһилиэк биир кырдьаҕас, ытык ыаллара буолан, 48 сыл устата эн-мин дэһэн, бииргэ дьоллоохтук олорон кэлбиттэрэ.

Сэрии ыар сылларыгар, 1942 сыллаахха Чурапчы улууһун үлэ фронугар диэн хоту күүс өттүнэн көһөрүллүү буолбут. Эһэлээх эбэм кыра оҕолорун илдьэ биир дойдулаахтарын кытта ыраах Кэбээйи улууһугар Сииттэҕэ көһөн тиийэн балык уустук үлэтигэр күүстэрин харыстаабакка үлэлээбиттэрэ.

Үлэ ыараханыттан, дьиэ-уот тымныытыттан, аһыыр ас тиийбэтиттэн көһүүгэ тиийбит дьон бары кэриэтэ хоргуйбуттар, ыалдьыбыттар. Бу ыарахан кыһалҕалаах кэмнэ эһэлээх эбэм биир дойдулаахтарыгар бары өттүнэн күүс-көмө буолбуттара. Ол курдук, Александра Тарабукина кэпсииринэн: тииһим килэйэн, ойоҕоһум уҥуоҕа атыгыраан, бырдам быстан, күн сириттэн күрэнэр муҥур уһукпар тиийэн сыттахпына Мотуруоналаах Миитэрэй баар буоланнар, кинилэр күннэтэ көрөн-истэн, аһатан-сиэтэн, эмтээн-томтоон бэттэх аҕалбыттара. Олох олорор дьолум тардан күндү дьонум күн-ый буолан абыраабыттара. Ол миигин эрэ буолуо дуо, элбэх киһини, оҕону быыһаабыттара… диэн ытамньыйа-ытамньыйа кэпсиирэ, махтанара үһү. Бу санаатахха,төһөлөөх элбэх Чурапчы дьоно, оҕото-уруута бу сэрии ыар сылларыгар тоҥон-хатан, аччыктаан өлбүттэрэ буолуой, ыарахан да күннэр-дьыллар ааспыттар…

Эбэм күнү быһа балыкка улэлээн сылайдар даҕаны уус тарбахтаах иистэнньэҥ буолан балыкка үлэлиир дьоҥҥо түүннэри иистэнэн үгүс-элбэх сылаас үтүлүк, кээнчэ, таҥас-сап тигэн биэрэрэ үһү.

Амарах санаалаах, айыы дууһалаах эбэлээх эһэм дьоҥҥо наар үтүөнү эрэ баҕараллара, туох баардарынан дьонноругар -сэргэлэригэр күүс-көмө, дурда-хахха буолаллар этэ диэн үөлээннээхтэрэ махтанан кэпсииллэрэ.

Биһиги аймахтан сэрии, көһөрүү ыар сылларын эрэйин-кыһалҕатын улахан эдьиийдэрим, мин эһэм, аҕам аҕата Эверстов Дмитрий Дмитриевич оонньуур оҕо саастарын кып-кыра санныларыгар сүкпүттэр эбит.

Мин күндү дьоммунан, хос эһэбинэн уонна эбэбинэн киэн туттабын, мэлдьи өйдүү-саныы сылдьыам.

 

Автор: Эверстов А., 10 кылаас