Ермолаева Екатерина Платоновна

Мин хос эбээм, тыыл бэтэрээнэ, Ермолаева Екатерина Платоновна суостаах сэрии 1941-1945 сылларыгар, Кыайыыны уһансааччылартан биирдэстэрэ буолар. Кини сэрии сут-кураан дьылларыгар, кыһыннары-сайыннары туох баар күүһүн-кыаҕын, өйүн-санаатын ууран туран үлэлээн-хамсаан кэлбитэ. Кэргэнэ, мин хос эһээм Ермолаев Петр Петрович сэрии бэтэрээнэ, рядовой саллаат 1943-1944 сылларга Старай Русса, Курскай Дуга сэриилэрин кыттыылааҕа, хайыһар ротатыгар сулууспалаабыта. 1944-1945 сылларга сэрииттэн иккис группалаах инбэлиит буолан кэлэн холхуоска хонуу биригэдьииринэн, ферма сэбиэдийиссэйинэн үлэлээбитэ. Сэрии сылларыгар “Килбиэннээх үлэтин иһин”, “1941-1945 сылларга Аҕа дойду сэриитигэр Германияны Кыайыы”, икки үбүлүөйүнэй мэтээллэринэн наҕараадаламмыта.

Хос эбээм Екатерина Платоновна — тыыл бэтэрээнэ, Таатта улууһун, Чычымах бөһүөлэгэр холхуоска суоччутунан, үүт тутааччы учуоччутунан, маҕаһыыҥҥа продавеһынан үлэлээбитэ. ”Сэрии сылларыгар килбиэннээх үлэтин иһин” мэтээлинэн наҕараадаламмыта.

Екатерина Платоновна, Петр Петрович Ермолаевтар сэрии кэнниттэн көрсөн, сөбүлэһэн, ыал буолан, биэс оҕону төрөтөн, 23 сиэннэнэн, 45 хос сиэннэнэн, элбэх хос хос сиэннэнэн дьоллоох олоҕу олорон ааспыттара.

Мин кыайыыны уһансыбыт хос эбээбинэн, эһээбинэн киэн туттабын!

Хаһан даҕаны бу орто дойдуга сэрии буолбатын. Куруук ыраас халлааннаах, эйэлээх олох буоларыгар баҕарабын!

Автор: Атласова В., 3 кылаас