Егоров Егор Федотович (1921-1978)

Мин хос эһээм Егоров Егор Федотович 1921 сыллаахха Бүлүү оройуонугар Чинэкэҕэ төрөөбүт. Бииргэ төрөөбүт убайдааҕа эрдэ өлбүт. Аҕата эмиэ эрдэ өлбүт. Кинини ийэтэ Егорова Елена Гаврильевна ииппит.

1942 сыллаахха Бүлүүтээҕи педагогическай училищены бутэрэн учуутал идэтин ылбыт (начальнай кылас учуутала). Кэлин үөрэҕин үрдэтэн, университекка үөрэммит, история, география учуутала буолбут.

Үөрэҕин бүтэрээт, сэриигэ ыҥырыллыбыт. Ыраах нэһилиэккэ учууталлаа диэн сэриигэ барбат сурук биэрбиттэр. Ньурбаҕа баран военруктар курстарыгар үөрэммит. Бүлүү куоратыгар сэриигэ барар дьоҥҥо военрук-инструктордаабыт. Сэрии сэбин туһанарга, нууччалыы быһаарсарга үөрэтэр эбит. Онтон Бүлүү Мастаах ыраах нэһилиэктэригэр учууталлаабыт: Модут, Дьооху, Хаҕын, Кыргыдай оскуолаларыгар сэбиэдиссэйинэн (билиҥҥитэ дириэктэринэн) үлэлээбитэ, элбэх киһи махталын ылбыт. Хос эһэм Егор Федотович оскуолаҕа олоҕун 34 сылын анаабыт, оскуола директорынан, завуһунан, кыра кылаас, история, география учууталынан үлэлээбит. Нэһилиэккэ аан дойду сонунун, сэрии хаамыытын бастакы иһитиннэрэччи, ырытан биэрээччи эһээм эбит. Хос эһээм олорбут, үлэлээбит сирдэригэр барытыгар агитатор, лектор, пропагандист буолар эбит.

Егоров Егор Федотович ааспыт үйэҕэ, үөрэхтээх киһи аҕыйах кэмигэр, үөрэххэ баҕалаах, кыахтаах буолан учуутал идэтин баһылаабыт, ыал буолан элбэх оҕоломмут, оҕолоро үөрэхтээх буолалларыгар бэйэтэ холобур буолбут.

Кини сэрии ыарахан сылларыгар учуутал идэлээх буолан, идэтинэн үлэлээбит, элбэх тулаайах, кыаммат-түгэммэт ыал оҕотун өйөөн, көмөлөһөн үөрэппит, нэһилиэккэ билиини-көрүүнү тарҕатааччы буолбут. Бу үлэтин иһин 1946 сыллаахха «Аҕа дойду Улуу сэриитигэр килбиэннээх үлэтин иһин» мэтээлинэн наҕараадаламмыт. Ол иһин кини тыыл бэтэрээнэ.

«Сэрии сылларыгар килбиэннээх үлэтин иһин» мэтээллээх.

 

Хаартыскаҕа: военруктар учебно-методическай түмсүүлэрэ, 1943 сыл атырдьах ыйын 25 күнэ. Егор Федотович үөһэ эрээккэ.

 

Автор: хос сиэнэ — Яковлев Н., 8 кылаас үөрэнээччитэ.