Дьяконов Семен Петрович 1925 сылаахха төрөөбүт.

Кинилэр төрүттэрэ Өлүөнэ өрүс Батамаайы биэрэгин хайаларыгар олорон балыктаан, бултаан бэйэлэрин көрүнэн олорбут дьон.

«Оҕонньор оҕо» төрүттэрэ, бэрт элбэх бииргэ төрөөбүттэр Түбэ нэһилиэгэр улахан аймах буолан элбэх оҕолонон-урууланан олорбуттара.

Семен Петрович 1943 сыллаахха сэриигэ ыҥырыллан барбыт. Кини Монголияҕа сулууспалаабыт, 1948 сыллаахха дойдутугар эргиллэн кэлбит.

Сэриигэ «1941-45 сс Германияны кыайыы иһин» , «Японияны кыайыы иһин» мэтээллэринэн, кэлин Кыайыы сылларын ахсын үбүлүөйнэй мэтээллэринэн, знактарынан наҕараадаламмыта. Дойдутугар эргиллэн кэлэн 7 сыл холкуоска биригэдьиирдээбитэ, онтон хара өлүөр диэри сылгыһыттаабыта, холкуос, сопхуос саҕана Түбэҕэ чааһынайдыын 700 сылгы баара. Сылгы көрүүтүгэр сайыҥҥы өҥүрүк куйааска буһан, кыһынын сырылас тымныыга тоҥон-хатан көрөр-истэр улахан сыралаах үлэтинэн нэһилиэк сайдыытыгар бэйэтин кылаатын киллэрбитэ.

Үлэҕэ бэрииниилээҕин иһин кинини сылгыһыттар ыстаарсайдарынан, ыччат настаабынньыгынан анаабыттара.

Кулуну ылыы былаанын аһары толорон харчынан бириэмийэлэммитэ, онтукатын кэргэнигэр чаһы атыылаһан бэлэхтээбит.

1980 сыллаахха «Запорожец» массыына фондатын ылбыта, ол саҕана фонда ылыы бэрт дэҥҥэ буолара. Нэһилиэк депутатынан хас да ыҥырыыга талыллан үлэлээбитэ, үлэтин түмүгүнэн Москваҕа ВДНХ-ҕа кыттар чиэһи ылбыта.

 

2 б Дьяконов Семен Петрович, Егорова Анна Романовна