Дьячковский Александр Семенович

(1911 – 1985гг)

         Мин хос эһэм Дьячковскай Александр Семеновичка (1911-1985 сс.) Амма Омоллоонун төрүт олохтооҕо.

Бойобуой суола: 1943-1945сс. Үлэ фронугар Лена пароходствотыгар байыаннай таһаҕас таһыытыгар сулууспалаабыт.
Аҕа дойду сэриитин иннинэ холкуос биригэдьииринэн үлэлии сылдьыбыт. Агроном курсун бүтэрбит. Сэрии сылларыгар «Лена» пароходствотыгар, саха маҥнайгы капитана А. Д. Богатыревка, матроһунан сулууспалаабыт. Манна 1943-1945 сылларга сайын Лена өрүһү Витимтэн Хоту Муустаах муора суолунан «Лендлиз» байыаннай суолталаах таһаҕаһын таспыттар (Аҕа дойду Улуу сэриитин кэмигэр Америка Холбоһуктаах штаттара Сэбиэскэй Сойууска союзник быһыытынан байыаннай техниканан, сэбилэниинэн, аһынан-үөлүнэн, эминэн-томунан, нефть бородууктатынан босхо хааччыйарын туһунан ЛЕНД-лиз диэн государственнай ааҕы түһэрсибит). Кыһынын Лена өрүс кытыытыгар пароход сайын оттор маһын бэлэмнээбиттэр. Сэрии кэнниттэн үйэтин тухары холкуоска сылгыһытынан үлэлээбит.

Александр Семенович ситэ үөрэммэтэх, бука хаһаайыстыба үлэтэ кыайтарбакка уонна дьалхааннаах кэм буолан, бастакы группаҕа үөрэнэ сылдьан уурайбыт. Былыргы сахалыы алфавитынан ааҕар-суруйар этэ. 1928 сыллаахха Потапова Елизавета Павлованы кэргэн ылан утуу субуу 5 оҕолоноллор: Луиза, Катя, Александр, Егор, Сэмэн.

Александр Семенович аҕата сэттэ уонча сүөһүлээх, хас да атыыр үөрдээх былыргынан орто кыанар сэниэ ыал эбиттэрэ үһү. Үттээһин бурдук тардар миэлиҥсэлээх, атынан от бурдук охсор массыыналаах эбит. Сэбиэскэй былаас олохтонуутугар холбоһуктааһын кэмигэр барытын артыалга холбообуттар эбит. Чыамайыкы уустара киирэн туппут нууччалыы моһуоннаах хас да дьиэлээҕиттэн үс дьиэни Аммаҕа көһөрөн киллэрбиттэр. Биир дьиэҕэ (билигин Ленин уонна Строд уулуссалар быһа охсуһууларыгар турар улахан дьиэ) улахан уола Егор Семенович 1937-1943 сс. Аммаҕа оройуон Госбаанын управляющайынан үлэлии сылдьан олорбут. Кини бэйэтин кэмигэр Дьокуускайдааҕы үп техникумун ситиһиилээхтик үөрэнэн бүтэрбит эбит. Биир дьиэ билиҥҥи балыыһа сиригэр-уотугар аптека, тиис балыыһата буолан, билиҥҥэ диэри үлэлиир. Биир дьиэ арҕаа дэриэбинэҕэ хойукка диэри детсад эҥин буолан турбута. Сааскы каникул саҕана Халбыык диэн атынан Уорайга эhээм ийэтин көрсө баран иһэн аҕата ыйан көрдөрбүт. Онно уончалаах эбит. Кырдьаҕас эдьиийдэрэ уонна убайдара төрөөбүт дьиэлэрэ Болугурга Ленин уулусса 30 нүөмэригэр билигин да турар.

Хос эhээлээх эбээм биэс оҕолонон билигин элбэх сиэн, хос сиэннэр бааллар. Улахан кыыстара, Луиза Александровна үс оҕото, сиэннэрэ, хос сиэннэрэ Дьокуускайынан, Болугурунан этэҥҥэ олороллор.Кыра кыыстара, Екатерина Александровна, кыыһын уонна сиэнин кытта Дьокуускайга олорор, сайын аайы дойдутугар тахсан дуоһуйа сынньанар. Улахан уоллара Александр Александрович үйэтин тухары Белоруссияҕа ыал буолан олорбута, билигин кэргэнэ, оҕолоро, сиэннэрэ кини олоҕун салгыыллар. Орто уол Егор Александрович төрөөбүт Болугуругар олорон, үлэлээн-хамсаан ааспыта, билигин кини аатын 4 кыыһа, сиэннэрэ ааттаталлар.

Эhээм Семен Александрович, эбээбинээн, Елизавета Ивановналыын, ыал буолбуттара быйыл 49-с сылыгар барда.   7 оҕолонон, бары этэҥҥэ улаатан, үлэһит буолан, Дьокуускайынан, Майанан, Амманан, Болугурунан олороллор. Сиэннэрэ улаатан, үөрэхтэнэн улэhит буолан эрэллэр.

Хос эбээлээх эhээм иккиэйэх бэйэлэрэ элбэх ыччаттанан, Россия, Белоруссия араас куораттарынан сиэннэрэ, хос сиэннэрэ ааттарын ааттата сылдьаллар.

Наҕараадалара: «Аҕа дойдуну көмүскүүр Улуу сэрии 1941-1945сс. килбиэннээх үлэтин иһин» мэтээл.
«Кыайыы 30 сылынан», «Кыайыы 40 сылынан» мэтээллэр.

Айыллаана Петрова,  Дьокуускай куорат №25 оскуолатын 3 кылаас үөрэнээччитэ

2025 сыл олунньу 18 күнэ