Дьячковская Аграфена Павловна

тыыл, үлэ бэтэрээнэ

Үлэ — тыыл ветерана Дьячковская (Сибирякова) Аграфена Павловна 1934с — ха Чурапчы оройуонун Одьулуун нэһилиэгэр колхозтаахтар  Ирина Петровна уонна Павел Маркович Сибиряковтар дьиэ кэргэттэригэр төрөөбүтэ. Дьоно уонтан тахсата оҕоломмуттарыттан соҕотох кыыс ордон улааппыта. Аҕата Павел Маркович колхозка кадровай булчут этэ, ийэтэ хонуу үлэһитэ, субан сүөһүнү көрөөччү, кэлин дайаарканан үлэлээбитэ.

Аҕа дойду уоттаах сэриитэ саҕаланыытыгар Груня кыыс 7-лээх  этэ. Бастакы кылааска 1943с-ха 9 саастааҕар Одьулуун 4 кылаастаах оскуолатыгар үөрэнэ киирбитэ. Онон сэрии сылын оҕото буолар. Аграфена Павловна бэйэтин ахтыытыттан : «Бастакы учууталым Кардашевская Александра Гаврильевна диэн этэ. Учуутал тиийбэт буолан биир учуутал иккилии кылааһы тэҥинэн үөрэтэрэ. Биһигини кытта биир кылаас иһигэр 3тэр эмиэ үөрэнэллэрэ. Сэрии сылларыгар үлэһит илии тиийбэт буолан биһигини, оҕолору, 3 — 4 кылаас кэнниттэн колхоз үлэтигэр көмөлөһүннэрэр буолбуттара. Сайынын окко бугул түгэҕин харбаан, оҕус сиэтэн буһар — хатар этибит уонна бааһынаҕа сыыс от ыраастааһыныгар сылдьар этибит. Онон үлэҕэ 10- лаах сааспытыттан эриллибиппит. Аҕам сэрии саҕаланыытыгар саастаах буолан үлэ фронугар ыыппыттара, онно баран сылтан ордук сылдьан кэлбитэ, кэпсииринэн Покровскайга кирпииччэ собуотугар үлэлээбит этэ. Кэлэн баран колхуоһугар салгыы кадровай булчутунан үлэлээбитэ. Мин 3-с кылааһы бүтэрбитим кэннэ дьонум Нуотараҕа баран кыстаабыттара, миигин оскулаттан өрөппүттэрэ, ол кыһын үөрэммэтэҕим. Инньэ гынан Одьулуун 4 кылаастаах оскуолатын 5 сылынан бүтэбитим. Ол курдук хаста эмэтэ өрөтөннөр, сааһым ыраатан хаалан 9-с кылааһы Чурапчыга үөрэнэ сылдьан ситэ бүтэрбэккэ үөрэнэн бүппүтүм. Ыалдьан хаалан күһүҥҥүлэммитим, онтубун туттара барбатаҕым.»

   Инньэ гынан Аграфена 1953-тан колхозка дайааркалыы тахсыбыта. Барыта 30 сыл устата, 1983с-ха пенсияҕа тахсыар диэри үтүө суобастаахтык үлэлээбитэ, үрдүк көрдөрүүлэри ситиспитэ. Аграфена Павловна үлэтинэн, дьиэтинэн — уотунан эрэ муҥурдамматаҕа, нэһилиэгин туһугар общественнай үлэҕэ эмиэ сыстыбыта. Ол курдук 3 төгүл нэһилиэк, биирдэ оройуон сэбиэтин депутата буола сылдьыбыта. Коммунистическай үлэ ударнига, хас эмэ төгүллээх социалистическай куоталаһыы кыайыылааҕа(1974с, 1975с, 1979с), колхоз чемпиона буолбута.

  Наҕараадалара: медаль материнства(5 оҕо күн — күбэй ийэтэ),

2 төгүл Саха сирин Верховнай Сэбиэтин президиумун Бочуотунай грамоталара,

Ожулун нэһилиэгин бочуоттаах олохтооҕо.

-Медаль ветерана тыла

-Медаль » Участник трудового фронта в 1941- 1945гг»

-2 знака » За заслуги перед районом» Чурапча.

-Кыайыы юбилейнай мэтээллэрэ (40 лет, 50лет, 60лет, 65лет, 70лет, 80лет).

-Знак » Ветеран сельского хозяйства Республики Саха(Якутия).

-Саха Республикатын » Ытык сүбэтэ»  знак «За вклад в развитие социально — экономического развития республики» Ытык кырдьаҕас, удостов. номер 1979, март 2024г

-Нагрудный знак » Почётный ветеран Чурапчинского улуса» удостов. номер 104 2024г.

       

Ытык кырдьаҕас Аграфена Павловна билигин кыра кыыһыгар Иринаҕа олорор, бэйэтин көрүнэр, кинигэ ааҕар, телевизор көрөр, нэһилиэгэр, дойдуга туох буола турарын сэҥээрэр, оҕолорун, сиэннэрин тустарынан сураһа олорор, 92с хаарыгар сылдьар.

Ааптар Наталья Дьяконова, Дьокуускай, ЯГНГ уонна Гермогенова Галина Егоровна , улахан кыыһа.