Дата рождения: 1937-11-11
Место рождения: с.2-Чакыр Амгинского района
Место работы: совхоз Амгинский
Должность: разнорабочая

Мин эбээм, Дьячковская Елена Иннокентьевна, 1937 сыллаахха сэтинньи ый 11 күнүгэр, Амма оройуонун 2-Чакыр нэһилиэгэр төрөөбүтэ. Кини 4 саастааҕар, Аҕа дойду сэриитэ саҕаламмыта. Бииргэ төрөөбүт икки убайдара сэриигэ ыҥырыллан, Ийэ дойдуларын көмүскүү барбыттара. Ньукулааскы диэн убайа, ыарыһах буолан ыҥырыллыбатаҕа. Ньукулааскы оһохчут этэ. Эбээм кыра кыыс , ол убайын батыһа сылдьан, Чакыр, Покровка нэһилиэктэригэр, ыалларга уонна тэрилтэлэргэ кирпииччэ оһох оҥоруутугар көмөлөспүтэ. Күһүн  бурдук быһыытыгар, тоҥон-хатан хаар түһүөр диэри үлэлииллэрэ. Оннук оонньуур оҕо саас диэни , кини билбэтэҕэ. 15 сааһыттан колхуос үлэтигэр , ньирэй көрөөччүнэн, ыанньыксытынан, кэлин детсад тутуллуоҕуттан, иитээччинэн үлэлээбитэ.
Аҕа дойду сэриитигэр убайа Егор – Уордьаннаах Дьөгүөр, хорсуннук сэриилэспитэ. Амма колхуос бастакы комбайнера. Элбэх кылаатын, бурдук үүннэриитигэр киллэрбитэ.
Иккис убайа Павел, хомойуох иһин сэрии толоонуттан эргиллибэтэҕэ.
Елена Иннокентьевна элбэх оҕо ийэтэ, элбэх оҕо эбээтэ, хос эбээтэ. Кини сыралаах үлэлэрин иһин, элбэх мэтээллэринэн, Бочуоттаах суруктарынан, «Бочуоттаах олохтоох» аатынан наҕараадаламмыта.
Кини олоҕун оҕолоро, сиэттэрэ, хос сиэттэрэ салҕыыллар. Эбээбитинэн киэҥ туттабыт! Кини аатыгар сүгүрүйэбит!

Автор записи: Фомина Анастасия Васильевна