Дмитрий Гаврилович Троев II

Терүччүбэр киэн туттар киһим

                                      

Мин эбээм убайа Дмитрий Гаврилович Троев II Лөгөй нэһилиэгиттэн төрүттээх.  Кини 1924 сыллаахха сэтинньи 8 күнүгэр Хаптанаҕа Евдокия уонна Хабырыыс Троевтарга иккис оҕонон төрөөбүтэ. 8  саастааҕар үөрэнэ киирбитэ. Бу үөрэнэр сылларыгар үөрэххэ дьоҕурдааҕа, улахан баҕалааҕа биллибитэ. Көмүлүөк оһох уотун сырдыгар ааҕара. Оскуолатыгар хойутаамаары, ыйдаҥаҕа балыттаран, 3 – 4 чааска туран, хатааһыннаах оскуолаҕа тиийэн төннере. Оскуоланы бүтэрбитин кэнниттэн 1936 сыллаахха Мүрү сэттэ кылаастаах оскуолата аһыллыбытыгар онно киирэр. 1939 сыллаахха сэттэ кылааһы ситиһиилээхтик бүтэрэр. Салгыы үөрэниэҕин 8 – с кылаас аһыллыбакка, районаҕа делопроизводителинэн, онтон оскуолаҕа делопроизводитель – счетоводунан үлэтин 15 саастааҕар саҕалыыр. Эһиилгитигэр Мүрү 7 кылаастаах оскуолатыгар 8,9 кылааһы аһаннар, онно үөрэнэн бүтэрэр. Бу Ийэ дойдубутугар фашистскай Германия сэриинэн саба түспүт кэмнэрэ этилэр.

1942  сыллаахха от ыйын 18 күнүгэр, начальнай кылаас учууталларын бэлэмниир курска үөрэнэ сырыттаҕына, Кыһыл Армия кэккэтигэр ыҥырыллан барар. Кини онно (584 – с сапернай полкаҕа) стрелогунан, (61 – с  мотострелковай полкаҕа) автоматчигынан, 398 туспа стрелковай взводка стрелогунан, 30 –с мотополкаҕа автоматчигынан, 622 – с туспа стрелковай взводка стрелогунан) Забайкалынан, Монголиянан сулууспалаабыта. Кини баар чааһа Японияны кытта сэриилэспитэ, кыраныыссаны эрэллээхтик харабыллаабыттара. Убайбыт сэрии иэдээнин илэ хараҕынан көрбүт, этинэн – хаанынан билбит дьоннортон биирдэстэрэ буолар. Советскай Армияттан 1947 сыллаахха бэс ыйын 30 күнүгэр демобилизацияламмыта, этэҥҥэ эргиллибитэ. Армияттан кэлээт үөрэҕин сал5аабыта.

1952 сыллаахха үөрэхтэрин бүтэрбит, оччолорго диплом ылбыт эдэр дьону республика араас муннугар ыыталлара. Убайбытын Орто-Халымаҕа ыыталлар. Онно 4 сыл орто оскуолаларга история учууталынан, Аргахтаахха оскуола директорынан, киэһээҥҥи оскуола директорынан үлэлээбитэ.

Төрөөбүт  оройуонугар кэлэн Суотту сэттэ кылаастаах оскуолатыгар завуһунан, Орто Эбэ сэттэ кылаастаах оскуолатыгар учууталынан, Өҥөргө завуһунан, районоҕа инспекторынан, Мүрү орто оскуолатыгар учууталынан, Майаҕас аҕыс кылаастаах оскуолатыгар директорынан, Мүрү киэһээҥҥи орто оскуолатыгар директорынан үлэлээбитэ. Пенсияҕа тахсан баран Мүрү орто оскуолатыгар история, обществоведение уруоктарын биэрбитэ. 1961 сылтан “Знание” обществоҕа чилиэнинэн киириэҕиттэн 70 сааһыгар диэри, сүрүн үлэтин кытта лектор, пропагандист быһыытынан дойдулар политическай балаһыанньаларын ырытара кэпсиирэ.

Убайбыт Троев Дмитрий Гаврилович үлэтин түмүгүнэн элбэх махтал суруктардаах, грамоталардаах, В.И.Ленин 100 сааһыгар “Үлэҕэ килбиэнин иһин” юбилейнай мэтээллээх. Сэрии ветеранын туоһутунан Японияны кыайыы иһин Сталин, Кыайыы юбилейнай мэтээллэрдээх, “Отечественнай сэрии” иккис степеннээх орденнаах, “Үлэ ветерана” мэтээллээх, “Партия ветерана” знактаах. Кини сэрии иккис группалаах инбэлиитэ. 1999 сыллаахха улуус баһылыгын дьаһалынан улуус Бочуоттаах гражданина аата сүктэриллибитэ.

Убайбыт биһиги дьиэ кэргэн киэн туттар киһибит буолар.

 

Автор: А.Бандеров 6 “б” кылаас үөрэнээччитэ