Данилова Мария Петровна

Мин хос эбээм.

Данилова Мария Петровна 1930с. Кэбээйи быыһыгар, Мээнэттэн үс көстөөх сиргэ Сүүнэҕэ иккис оҕонон күн сирин көрбүтэ.

1938 с. «Yүнэр» холкуос тэриллибит. Онно хос эбээм оҕо эрдэҕиттэн көмөлөһөрө.

Оскуолаҕа киирэр кэмигэр оччолорго Сүүнэҕэ, Мээнэҕэ да оскуола суох буолан, Хатырыктаах түөрт кылаастаах начаалынай оскуолатыгар кэлэн үөрэнэр. Бу оскуола начаалынай кылааhын бүтэрэн баран, сэрии ыар-аччык сылларыгар кыhарыйтаран ситэ, салгыы үөрэммэтэх. Элбэх оҕону үөрэх сырдык кыhатыттан матарбыт алдьархайдаах Аҕа дойду Улуу сэриитин кэмэ буолан, 1943с. 13 сааhыттан холкуос үлэhитэ буолар. Оччотооҕу ыарахан сэрии сылларынааҕы кэм оҕолорунуу, кыра сааhыттан сүөhү иитиитин курдук ыар үлэҕэ эриллэн, сайынын буhууну, үөнү-көйүүрү, кыhынын аам-даам тымныыны кытары сөптөөх таҥаhа суох, куруутун туос аччык сылдьан бу ыарахан үлэҕэ хара маҥнайгыттан эриллэн барбыт.

1954 с. диэри дьонунаан Сүүнэҕэ, Мээнэҕэ олорон үлэлээбиттэр.

Дьэ, ити курдук, бастаан утаа Кэбээйи Чагдатын быыhыгар тэриллибит холкуостан саҕалаан, Сүүнэнэн, Мээнэнэн, Хондураайынан, Таастааҕынан, Биллээҕинэн, Улахан Yрэххэ, Тарын Yрэххэ уонна Чэкээҕэ тыа хаhаайыстыбатын биир тутаах салаатыгар – сүөhү иитиитигэр үйэ аҥаара , 50-тан тахса сыл устата илиитин араарбакка үлэлээн, кэлин сааhыран баран, уhун унньуктаах үлэтин нэhилиэгин киинигэр Аhымаҕа түмүктээбитэ.

Наҕараадалара: 1950-1956сс. Бочуоттуур грамоталарынан; 1973с. Саха АССР Yрдүкү Сэбиэтин Бочуоттуур грамотатынан, 3 төгүл ССКП обкомун, Саха АССР Миниистирдэрин Сэбиэтин, Профсоюз уобаластааҕы Сэбиэтин, ЫБСЛКС обкомун Бочуоттуур грамоталарынан (1977, 1982), икки төгүл тыа хаhаайыстыбатын министиэристибэтин Бочуоттуур Дипломнарын (1980, 1983) ЫБСЛКС КК Бочуоттуур грамотатынан 1982с.. 1978с. Yлэ албан аатын III степеннээх уордьанын кавалера, «IX пятилетка кыайыылааҕа». 1980с. Саха сирин дьахталларын III съеhигэр кыттыыны ылбыт, 1982с. үлэ бэтэрэээнэ. Саха сиригэр үлэhит династияларын Бочуотун кинигэтигэр киирбитэ.

Хос эбээм 5 бухатыыр уолаттардаах: Илья Петрович Данилов, Петр Петрович Данилов, Никита Васильевич Леонтьев, Спиридон Васильевич Леонтьев уонна Михаил Васильевич Данилов – эhээм.

Билигин биhиги кини оҕолоро, сиэннэрэ уонна хос сиэннэрэ сылын аайы сайыны Чэкээ сайылыгар атаарабыт. Хос эбээбит үлэтин салҕааччы иккис уола Данилов Петр Петрович «СИР» тыа хаhаайыстыбатыгар сылгы – сүөhү иитэр, хос сиэннэрэ оҕолор ньирэй аhатарга – харайарга көмөлөһөбүт.

Мин Мария Петровна хос сиэнэ буоларбынан олус киэҥ туттабын!

 

Автор: МОБУ СОШ №26